पुणे : पुणे महानगरपालिकेच्या आगामी निवडणुकीच्या पार्श्वभूमीवर प्रभाग क्रमांक १६ ‘अ’ मध्ये राजकीय हालचालींना वेग आला असून, भारतीय जनता पार्टीने शेवटच्या क्षणी विश्वास दाखवत सौ. शिल्पा नितीन होले यांना अधिकृत उमेदवारी देत AB फॉर्म प्रदान केला आहे. त्यानुसार सौ. शिल्पा होले यांनी प्रभाग क्रमांक १६ ‘अ’ मधून आपला उमेदवारी अर्ज दाखल केला आहे.
गेल्या अनेक वर्षांपासून प्रभाग क्रमांक १६ मध्ये भाजपाच्या संघटनात्मक कार्याचा कणा ठरलेले निष्ठावंत कार्यकर्ते जनतेच्या सुखदुःखात सदैव सहभागी राहिले आहेत. भाजपाची विचारधारा घराघरात पोहोचवित झेंडा फडकत ठेवणाऱ्या या कार्यकर्त्यांच्या पाठबळावरच ही उमेदवारी निश्चित झाल्याचे बोलले जात आहे.
मागील निवडणुकीत सौ. शिल्पा नितीन होले यांचा थोडक्या मतांनी झालेला पराभव हा आजही प्रभागातील नागरिकांच्या मनातील वेदना मानला जातो. मात्र, पराभवाने खचून न जाता त्यांनी सामाजिक जाणिवेतून आपले कार्य अखंड सुरू ठेवले. महिला, लहान मुले, ज्येष्ठ नागरिक यांच्या प्रश्नांसाठी सतत रस्त्यावर उतरून लढा देणे, तसेच शासकीय व निमशासकीय योजनांचे लाभ गरजूंपर्यंत पोहोचविण्यासाठी अहोरात्र कार्यरत राहणे, हीच त्यांची ओळख ठरली आहे.
जनसेवक नितीन होले यांची पत्नी म्हणून नव्हे, तर एक स्वतंत्र, संवेदनशील आणि लढवय्या कार्यकर्ती म्हणून सौ. शिल्पा नितीन होले यांची उमेदवारी प्रभाग क्रमांक १६ ‘अ’ मध्ये चर्चेचा विषय ठरत असून, भाजपाच्या शेवटच्या क्षणातील या निर्णयाकडे राजकीय वर्तुळाचे लक्ष लागले आहे.नागरिकांचा प्रतिसाद आणि कार्यकर्त्यांचा उत्साह पाहता, ही लढत अधिकच रंगतदार होणार असल्याचे चित्र स्पष्ट होत आहे.
