पुणे महापालिकेच्या नुकत्याच पार पडलेल्या निवडणुकीमध्ये यत्र तत्र सर्वत्र भारतीय जनता पक्ष विजय मिळवल्यानंतर आपल्या समर्थक कार्यकर्त्याची वर्णी स्विकृत सदस्य पदी लागावी यासाठी पुणे शहरातील विद्यमान व माजी आमदार यांनी कंबर कसली असल्याने या अतितटीच्या निवड प्रक्रियेचा चेंडू अखेर देवाभाऊ यांच्या दरबारात जाऊन पडला आहे. पूर्व पुणे भागातील वडगाव शेरी हडपसर व दक्षिण पुणे कॅन्टोन्मेंट परिसरामध्ये भारतीय जनता पक्षाला बसलेल्या फटक्याचा विचार करून निर्णय घेतला जातो की पुन्हा आमदारांची मर्जी राखण्यासाठी विधानसभा नुसार स्वीकृत सदस्य दिले जातील हा सध्या चर्चेचा विषय निर्माण झाला आहे. भारतीय जनता पक्षात निष्ठावान त्यागी समर्पित आणि सातत्यपूर्ण कार्य करणाऱ्या कार्यकर्त्यांची मोठी फौज अपेक्षित असताना स्वीकृत सदस्यत्वाचा विचार करताना महाराष्ट्राचे मुख्यमंत्री देवेंद्र फडणवीस कोणता निर्णय होईल याकडे सर्वांचे लक्ष लागले आहे. पुणे महापालिकेमध्ये 10 सदस्यांची स्वीकृत सदस्य म्हणून नियुक्ती केली जाणार आहे यापैकी सर्वाधिक 7 सदस्य भारतीय जनता पक्षाकडून तर राष्ट्रवादी काँग्रेस पक्ष (दोन्ही) व अखिल भारतीय काँग्रेस पक्षाच्या वाट्याला प्रत्येकी एक अशा एकूण 3 जागा मिळणार आहेत. राष्ट्रवादी काँग्रेस पक्षाच्या वाट्याला आलेल्या दोन जागांपैकी एक जागा शरद पवार गट यांना दिली जाण्याची शक्यता आहे.
सर्वसाधारणपणे आजपर्यंत पुणे शहरामध्ये स्वीकृत सदस्य नियुक्ती करताना पक्षाला ज्या भागांमध्ये फटका बसला आहे त्या भागात स्वीकृत सदस्यत्वाची संधी देत पुन्हा पक्षाच्या वाटचालीला उभारी देण्यासाठी केला जात असतो. परंतु मागील काही वर्षापासून राज्यस्तरावरील नेत्यांचा निष्ठावंत कार्यकर्ता या पदावर विराजमान झालेला पुणेकरांनी पाहिला आहे त्यामुळे स्वीकृत सदस्यांच्या यादीमध्ये धक्कादायक नावे येण्याची शक्यता नाकरता येत नाही. पुणे शहरातील भारतीय जनता पक्षासह विविध पक्षातील आमदारांनी आपल्या समर्थकांसाठी कंबर कसली असून ऐन केन प्रकारे आपल्या समर्थकालाच संधी मिळावी यासाठी प्रचंड ताकद लावली असून भारतीय जनता पक्षाच्या बालेकिल्लातही दोन-तीन नावांच्या शिफारशीला आल्या असल्याने शेवटी अंतिम निर्णय देवा भाऊ घेणार या तत्त्वावर यादी अंतिम करण्यासाठी मुंबईकडे रवाना करण्यात आली आहे.
भारतीय जनता पक्षाच्या वतीने कमालीची गुप्तता पाळत महापौर आणि उपमहापौर पदी संधी देता नाही अखेरच्या क्षणापर्यंत कोणालाही याची कल्पना देण्यात आली नव्हती; त्याप्रमाणेच स्वीकृत सदस्य निवड ही गुलदस्तात राहणारा असून कदाचित थेट सभागृह नेत्यांच्या हातामध्ये ही यादी जमा होण्याची शक्यता नाकारता येत नाही. पुणे महापालिकेत विरोधक असलेल्या राष्ट्रवादी काँग्रेस व काँग्रेस पक्षाच्या स्वीकृत सदस्य पदाचा निर्णय सुद्धा अशाच प्रकारे होण्याची शक्यता नाकारता येत नाही. सध्या पुणे शहरांमध्ये फक्त सर्व पक्षांमध्ये एकच चर्चा आहे ती म्हणजे स्वीकृत सदस्यपदी कोणाची वर्णी लागणार! भारतीय जनता पक्षाकडे सर्वाधिक स्वीकृत सदस्य संख्या असल्याने या पक्षात सर्वाधिक हालचाली सुरू आहेत.
