पुणे महापालिकेच्या महापौरपदासाठी भाजपच्या प्रदेशाध्यक्षांसह वरिष्ठ नेत्यांच्या सोमवारी रात्री झालेल्या बैठकीत तीन नावे निश्चित करण्यात आली. आज मंगळवारी सकाळी महापौरपदासाठी अर्ज दाखल करण्यापूर्वी भाजपकडून अंतिम नाव जाहीर होण्याची शक्यता आहे. राज्य पातळीवरून आलेल्या अनेक संधीमध्ये कायम दुर्लक्षित राहिलेल्या खडकवासला मतदारसंघाला या महापौर पदाची संधी देऊन या भागातील पक्ष संघटन मजबूत करण्याचा धोरणात्मक निर्णय झाल्याची चर्चा सुरू आहे. विद्येचे माहेरघर म्हणून पुणे शहराची ओळख असली तरी सध्या देशातील चौथ्या क्रमांकाचे शहर म्हणून ‘स्मार्ट सिटी’ अशी नवी ओळख निर्माण झालेल्या शहरासाठी स्मार्ट महापौर दिल्यास पक्षाला त्याचा फायदा होईल अशी भूमिका जोर धरू लागली आहे. पुणे शहर भारतीय जनता पक्षाच्या वतीने ११९ जागांवर विजय मिळवलेल्या आहे. त्यामुळे महापालिकेत भाजपचाच महापौर होणार हे निश्चित झाले होते.
सर्वसाधारण महिला गटासाठी महापौरपदाचे आरक्षण जाहीर झाल्यानंतर भाजपमधील सर्वसाधारण गटातील इच्छुक महिला नगरसेवकांकडून जोरदार मोर्चेबांधणी सुरू झाली होती. इच्छुकांनी मुख्यमंत्री देवेंद्र फडणवीस यांच्यासह भाजपच्या वरिष्ठ नेत्यांच्या गाठीभेटी घेत महापौरपदाची माळ आपल्याच गळ्यात पडण्यासाठी प्रयत्न सुरू केले होते. मंगळवारी महापौर व उपमहापौरपदासाठी अर्ज दाखल केले जाणार आहेत.
पुणे शहर भारतीय जनता पक्षाच्या वतीने प्रदेश कार्यालयाकडे स्वीकृत सदस्यांसह विविध समित्यावर इच्छुक असलेल्या सर्व लोकप्रतिनिधींची नावे मान्यतेसाठी पाठवण्यात आली आहेत. विशेष म्हणजे पुणे शहरातील सात स्वीकृत सदस्यपदी वर्णी कोणाची लागणार याची सर्वाधिक चर्चा शहरांमध्ये सुरू आहे. या सात जागांमध्ये संधी मिळवण्यासाठी गेली आठ दिवस सर्वांची धावपळ सुरू आहे. सभागृहामध्ये विरोधकांचे अनुभवी चेहरे विजयी झाल्याने सभागृहामधील पक्षाचे प्राबल्य अबाधित ठेवण्यासाठी जुन्या निष्ठावान चेहऱ्यांना पक्षाच्यावतीने संधी देण्याची शक्यता निर्माण झाली आहे. पुणे शहरामध्ये भारतीय जनता पक्षाला 2014 पासून जनमतांचा कौल वाढत असताना यामध्ये सुद्धा काही चेहऱ्यांना संधी देणे शक्य झाले नाही अशा पुन्हा पल्लवी झाल्या आहेत.
दरम्यान, भाजपचे प्रदेशाध्यक्ष रवींद्र चव्हाण यांच्यासमवेत उच्च व तंत्रशिक्षणमंत्री चंद्रकांत पाटील, राज्याच्या नगर विकास विभागाच्या राज्यमंत्री माधुरी मिसाळ, पक्षाचे प्रदेश महामंत्री राजेश पांडे, शहराध्यक्ष धोरज घाटे यांची सोमवारी रात्री पुण्यात बैठक झाली. भाजपकडून निवडणुकीत उमेदवारी अर्ज दाखल करेपर्यंत उमेदवाराचे नाव जाहीर न करण्याची गुप्तता पाळण्यात आली होती.
महापौरपदासाठीचे अंतिम नावही ऐनवेळी जाहीर केले जाण्याची शक्यता नाकारता येत नाही. दरम्यान, भाजपने महापौरपदासाठी निवडलेल्या तीन महिला नगरसेविकांमध्ये खडकवासला मतदारसंघातून वर्षा तापकीर, मंजूषा नागपुरे, तर पर्वती मतदारसंघातून मानसी देशपांडे यांचे नाव आघाडीवर आहे.
भाजप धक्कातंत्र वापरणार?
भाजपकडून विविध निवडणुकांमध्ये धक्कातंत्राचा वापर केला जातो. त्याद्वारे नवख्या व अनपेक्षित चेहऱ्याला संधी देण्याची भाजपची परंपरा आहे. तसे झाल्यास शिवाजीनगर विधानसभा मतदारसंघातून अनपेक्षित व नवखा चेहरा महापौरपदासाठी पुढे येण्याची शक्यता नाकारता येत नाही.
‘स्थायी’चे अध्यक्षपद कोणाला ?
महापालिकेत महापौर, उपमहापौर यांच्यानंतर स्थायी समितीचे अध्यक्षपद सर्वांत प्रबळ समजले जाते. भाजपकडून स्थायी समितीचे अध्यक्षपद समाविष्ट गावांना देण्याचा विचार सुरू आहे. मात्र त्यावर अद्याप निर्णय झालेला नाही. त्यामुळे स्थायीचे अध्यक्षपद खरोखरच समाविष्ट गावांना मिळणार का? याबाबतही कमालीची उत्सुकता आहे.
फडणवीस करणार शिक्कामोर्तब
अंतिम तीनपैकी एका नावावर मंगळवारी सकाळी मुख्यमंत्री देवेंद्र फडणवीस यांच्याकडून शिक्कामोर्तब केले जाण्याची शक्यता आहे.
