पाकिस्तानी गुप्तहेर महिलेला देशाची गोपनीय माहिती पाठविल्या प्रकरणी संरक्षण संशोधन आणि विकास संस्थेच्या (डीआरडीओ) पुण्यातील संशोधन आणि विकास आस्थापन या प्रयोगशाळेचे वरिष्ठ शास्त्रज्ञ डॉ. प्रदीप कुरुलकर याच्या वरील दोषारोप निश्चितीसाठीचा युक्तिवाद इन कॅमेरा सुरू झाला आहे. डॉ. कुरुलकरला दहशतवाद विरोधी पथकाने (एटीएस) ४ मे २०२३ ला अटक केली होती. त्याच्या विरोधात एटीएसने २०२३ मध्ये दोन हजार पानांचे आरोपपत्र दाखल केले आहे. डॉ. कुरुलकर याने पाकिस्तानी हेरांना माहिती कशी पाठवली याची माहिती आरोपपत्रात नमूद आहे.
या प्रकरणात विशेष सरकारी वकील उज्ज्वला पवार सरकार पक्षाच्या वतीने बाजू मांडत आहेत. तर, डॉ. कुरूलकर याच्यावतीने अॅड. ऋषिकेश गानू काम पाहत आहेत. या प्रकरणी आज डॉ. कुरूलकर याच्यावर आरोप निश्चितीसाठीचा युक्तिवाद इन कॅमेरा झाला. सरकार पक्ष आणि बचाव पक्षाच्या युक्तिवादानंतर आरोप निश्चिती झाल्यावर खटल्याच्या सुनावणीला सुरुवात होणार आहे. या प्रकरणाची पुढील सुनावणी गुरुवारी (ता. २८) होणार आहे.
