भारतीय जनता पार्टीचे प्रभाग क्र. १०, बावधन–भुसारी कॉलनी प्रभागातील अधिकृत उमेदवार दिलीप वेडेपाटील यांना बावधन ग्रामस्थांच्या वतीने जाहीर पाठिंबा देण्यात आला. या पाठिंब्याच्या कार्यक्रमास बावधन गावातील ज्येष्ठ नागरिक, महिला, युवक, व्यापारी वर्ग तसेच विविध सामाजिक संस्थांचे प्रतिनिधी मोठ्या संख्येने उपस्थित होते. ग्रामस्थांच्या वतीने विलास आप्पा वेडेपाटील व निखिल राजाराम वेडेपाटील यांनी या कार्यक्रमाच्या नियोजन व आयोजनात प्रमुख भूमिका बजावली.
यावेळी उपस्थितांना संबोधित करताना दिलीप वेडेपाटील यांनी गावाच्या सर्वांगीण विकासाचा स्पष्ट व ठोस आराखडा मांडला. गावातील रस्ते विकासाच्या कामात अडथळा ठरत असलेली जुनी मंदिरे ग्रामस्थांच्या भावना जपत सन्मानपूर्वक स्थलांतरित करण्याबाबत ताबडतोब निर्णय घेण्यात आला असून संबंधित मंदिर त्वरित काढण्याचे काम सुरू करण्यात येईल, असे त्यांनी जाहीर केले. या निर्णयामुळे रस्ते रुंदीकरण व वाहतूक सुरळीत होण्यास मोठी मदत होणार आहे.
तसेच गावातील नागरिकांसाठी सामाजिक, सांस्कृतिक व सामूहिक कार्यक्रमांसाठी सुसज्ज व बहुउद्देशीय सांस्कृतिक सभागृह उभारण्यात येईल, अशी ठाम घोषणा त्यांनी केली. या सांस्कृतिक हॉलमुळे ग्रामस्थांना विविध कार्यक्रमांसाठी स्वतंत्र व सुसज्ज जागा उपलब्ध होणार असून गावातील सामाजिक जीवनाला नवी चालना मिळणार आहे.
पर्यावरण संवर्धनाच्या दृष्टीने रामनदी सुशोभीकरण प्रकल्पालाही प्राधान्य देण्यात येणार असल्याचे त्यांनी सांगितले. नदी स्वच्छता, काठाचे सुशोभीकरण, पादचारी मार्ग, वृक्षारोपण आणि प्रदूषण नियंत्रण यासारख्या उपाययोजनांमुळे रामनदी परिसर अधिक सुंदर, सुरक्षित व नागरिकांसाठी उपयुक्त बनवण्यात येईल.
याशिवाय पाणीपुरवठा, ड्रेनेज व्यवस्था, रस्ते, सार्वजनिक स्वच्छता, तसेच महिला, युवक व ज्येष्ठ नागरिकांसाठी आवश्यक मूलभूत सुविधा अधिक सक्षम करण्यासाठी विविध विकासकामे तातडीने हाती घेण्यात येतील, असेही त्यांनी नमूद केले.
कार्यक्रमाच्या शेवटी ग्रामस्थांनी एकमताने दिलीप वेडेपाटील यांना पाठिंबा जाहीर करत त्यांच्या निर्णयक्षम नेतृत्वावर पूर्ण विश्वास व्यक्त केला. बावधन गावाच्या जलद व नियोजित विकासासाठी सर्व ग्रामस्थ एकत्र येऊन त्यांना सहकार्य करतील, असा निर्धार यावेळी व्यक्त करण्यात आला.
