पुणे शहरात महायुतीतील मित्रपक्ष असलेल्या भारतीय जनता पक्षाने राष्ट्रवादी काँग्रेस पार्टी यांच्या थेट लढतीचा परिणाम म्हणून संपूर्ण शहरात सुरू झालेला उभा संघर्ष लक्षात घेऊन मुख्यमंत्री देवेंद्र फडणवीस यांनी शायरीतून प्रचाराचा दर्जा ठेवण्याचे संकेत देत विकासाची भाषा करून पुणेकरांना आवाहन केले. केंद्र व राज्य सरकारने निधी मंजूर करूनही पुण्यातील भाजपच्या त्रिकुटाने संथ गतीने कामे केल्याची टीका उपमुख्यमंत्री अजित पवार यांनी प्रचार सभेत केली. त्यानंतर आज त्याला भाजपने सभेतून जोरदार उत्तर देताना तुम्ही इतके वर्ष पालकमंत्री होता तर भरीव काम का केले नाही? अशी टीका भाजपच्या नेत्यांनी केली. तर देवेंद्र फडणवीस यांनी ””शरीफ हैं हम, किसी से लड़ते नहीं; वरना ज़माना जानता है, हम किसी के बाप से डरते नहीं।”
फडणवीस यांनी त्यांच्या भाषणाला सुरुवात करताना पुण्यात सुरू झालेल्या भाजप राष्ट्रवादी थेट संघर्ष या विषयाला हात घालत म्हणाले, ”पुण्याची निवडणूक हळहळू गरम होत आहे. ते दादा बोलत आहे, हे दादा बोलत आहेत, आण्णाही बोलत आहेत. निवडणुकीचा रंग भरत असताना जितकी मागे ही चर्चा जाईल. तेवढे तुम्ही काय केले हे लोकांना सांगावे लागेल. आम्ही उत्तर दिले नाही तर लोकांना आपण दुर्बल वाटतो पण माझा निवडणुकीचा फोकस हा पूर्ण विकासावर आहे. पुण्यात मी काही दिवसांपूर्वी ३ हजार कोटी रुपयांच्या कामाची सुरुवात केली. सध्या या ठिकाणी ९ हजार कोटी रुपयांची कामे सुरु आहेत. तरी गेल्या पाच वर्षात आम्ही काय केले असे कोणी विचारणार असेल तरी तुम्ही स्वतःचा चेहरा आरशात बघा असेही फडणवीस अजित पवार यांना उद्देशून म्हणाले.
भारतीय जनता पक्षाने पुणे शहरात काय केले? भारतीय जनता पक्ष काय करत आहे हे पुणेकरांना ज्ञात आहे. आम्ही गेल्या पाच वर्षात काय केले हे विचारत असाल तर तुम्हाला आरशात हताश झालेले तोंड बघावे लागले असा टोलाही फडणवीस लगावला. पुणे आणि पिंपरी चिंचवड महापालिकेच्या निवडणुकीच्या प्रचारात अजित पवार यांनी भाजप विरोधात आघाडी उघडली आहे. गुन्हेगांरांना मिळणारे अभय, विकास कामांची मंदावलेली गती यावरून स्थानिक नेत्यांवर नाव न घेता टीका केली आहे. त्यास आज कात्रज येथील सभेत केंद्रीय राज्यमंत्री मुरलीधर, उच्च व तंत्र शिक्षणमंत्री चंद्रकांत पाटील यांनी पवार यांच्यावर टीका केली. मोहोळ म्हणाले, ”पुण्याचे विस्तारीकरण आगामी काळात होणार आहे त्यामुळे दूरदृष्टी ठेवून कोणत्या उपाययोजना केल्या हे लक्षात आले नाही का? पुणेकर आता विरोधकांना सत्तेत यायची संधी देणार नाहीत.”
तर अजित पवारांकडे वर्षानूवर्ष पुणे आणि पिंपरी चिंचवड महापालिका होत्या. परंतू अनेक वर्ष पुण्याचे पालकमंत्री राहिलेला असताना तुम्हाला या काळात भरीव विकास का केला नाही अशी टीका चंद्रकांत पाटील यांनी केली.
