पुणे महापालिकेच्या निवडणुकीची घोषणा झाली असून आगामी निवडणुकीची राजकीय समीकरणे काय असतील याची चर्चा आता सुरू झालेली आहे. भाजपने महापालिका पुन्हा एकदा ताब्यात घेण्यासाठी कंबर कसलेली असताना महाविकास आघाडीने मात्र अजित पवार यांना सोबत घेतल्यास भाजपला रोखता येईल अशी भूमिका घेतलेली आहे. राष्ट्रवादी काँग्रेसने आम्ही समविचारी पक्षांसोबत जाण्यास तयार आहोत असे सांगितले आहे. त्यामुळे आगामी काळात भाजप विरोधात दोन्ही राष्ट्रवादी, शिवसेना उद्धव बाळासाहेब ठाकरे, काँग्रेस आणि मनसे यांची मोट बांधली पाहायला मिळू शकणार आहे.
मात्र, अजित पवार यांनी स्वतंत्र निवडणूक लढवण्याची भूमिका घेतल्यास पुणे महापालिकेत भाजप महायुगास आघाडी आणि राष्ट्रवादी काँग्रेस अशी तिरंगी निवडणूक होणार आहे. गेल्या साडेतीन वर्षापासून पुणे महापालिकेच्या निवडणुका लांबणीवर पडल्यामुळे प्रशासक राजवट सुरू आहे. अखेर ही प्रशासकीय राजवट जानेवारी महिन्यात संपणार आहे. निवडणुकीची आचारसंहिता जाहीर होताच आगामी निवडणुकीत भाजप स्वतंत्रपणे निवडणूक लढवेल असे मुख्यमंत्री देवेंद्र फडणवीस यांनी जाहीर करताना यासोबत एकनाथ शिंदे यांच्या शिवसेनेला सोबत घेतले जाईल असे संकेत ही त्यांनी दिलेले आहेत. फडणवीस यांच्या या घोषणेमुळे महायुतीतील अजित पवार यांची राष्ट्रवादी काँग्रेस आणि भाजप हे प्रमुख पक्ष एकमेकांच्या विरोधात लढणार असल्याचेही स्पष्ट झालेली आहे.
विरोधक एकत्र येणे अपरिहार्यता
महापालिका निवडणुकीत भाजपने 165 पैकी 125 जागा जिंकण्याचे लक्ष ठेवलेले आहे. त्यावरूनच भाजप आणि राष्ट्रवादी काँग्रेस एकत्र लढणार नाही हे स्पष्ट झालेले होते आज याची अधिकृत घोषणा मुख्यमंत्री फडणवीस यांनी केली. शहरातील आठही विधानसभा मतदारसंघात भाजपचे प्राबल्य वाढलेले असताना भाजपच्या विरोधात कोणताही पक्ष स्वतंत्रपणे पूर्ण ताकदीने निवडणूक लढू शकणार नाही हे वास्तव विरोधी पक्षातील सर्व पक्षांनी मान्य केलेले आहे. त्यामुळेच गेल्या दोन-तीन महिन्यांपासून महाविकास आघाडी म्हणून एकत्रितपणे निवडणूक लढवण्याची भूमिका घेतली गेलेली आहे. त्यातच राष्ट्रवादी काँग्रेस आणि राष्ट्रवादी काँग्रेस शरदचंद्र पवार पक्ष हे दोन्ही एकत्र येण्याची चर्चा सुरू आहे.
त्यास तुर्त शरदचंद्र पवार यांच्या राष्ट्रवादीचे काँग्रेसचे शहराध्यक्ष प्रशांत जगताप यांनी विरोध दर्शवलेला असला तरी त्यांच्या पक्षातील बहुतांश माजी नगरसेवक आणि पदाधिकारी यांची अजित पवार यांच्यासोबत जाण्याची भूमिका आहे. त्यामुळे पुढील काळात हे दोन्ही पक्ष एकत्रितपणे निवडणुका लढवतील हे जाहीर केले जाईल. दोन्ही राष्ट्रवादी काँग्रेस भाजपच्या विरोधात लढण्यास तयार असतील तर त्यास काँग्रेस, शिवसेना, आणि मनसे या पक्षांकडून देखील संमती असणार आहे. भाजप विरोधात सर्व पक्ष एकत्र येणे ही राजकीय अपरिहार्यता आहे. त्यामुळे हे ‘शहाणपण’ सर्व पदाधिकाऱ्यांनी दाखवले पाहिजे असा मोलाचा सल्ला काँग्रेसमधील काही अनुभवी नेत्यांकडून दिला जात आहे.
राष्ट्रवादीची मदार उपनगरांवर
कसबा पेठ, पर्वती, शिवाजीनगर, कोथरूड आणि पुणे कॅन्टोन्मेंट या पाच विधानसभा मतदारसंघात भाजपचे बऱ्यापैकी प्राबल्य आहे. या ठिकाणाहून सुमारे 100 नगरसेवक निवडून दिले जाणार आहेत. तर वडगाव शेरी, हडपसर आणि खडकवासला या उपनगरांमधील मतदारसंघांमधून सुमारे 70 नगरसेवक महापालिक निवडून दिले जातील. या उपनगरांमध्ये राष्ट्रवादी काँग्रेसची ताकद आहे. पण दोन्ही राष्ट्रवादी काँग्रेस स्वतंत्रपणे लढल्यास त्याचा फायदा भाजपला होईल. त्यामुळे दोन्ही राष्ट्रवादीने एकत्र यावे अशी भूमिका दोन्ही राष्ट्रवादीमधील पदाधिकाऱ्यांची आहे. त्याचप्रमाणे शहराच्या मध्यवर्ती भागातील प्रभागात काँग्रेस, मनसे ,आणि शिवसेना उद्धव बाळासाहेब ठाकरे या पक्षांची ताकद आहे. ही ताकद एकत्रितपणे भाजप विरोधात उभे राहिल्यास आणि त्याला राष्ट्रवादी काँग्रेसची मदत मिळाल्यास भाजप पुढे आव्हान उभे केले जाऊ शकते. त्यामुळे महाविकास आघाडी आवश्यक आहे अशी भूमिका काँग्रेस आणि मनसेतील पदाधिकाऱ्यांकडून मांडली जात आहे.
राष्ट्रवादी पुढे असणार ही अट
राज्य सरकारमध्ये भाजप आणि राष्ट्रवादी काँग्रेस हे दोन्ही पक्ष एकत्र आहेत. पुणे महापालिका निवडणुकीत दोन्ही पक्ष एकमेकांविरोधात निवडणूक लढवल्यानंतर त्यांनी निवडणूक नंतर पुन्हा एकत्र येऊ नये अशी भूमिका महाविकास आघाडी कडून घेतली जात आहे. राष्ट्रवादीने या अटीचे पालन केले तर आगामी निवडणुकीत नंतर ही ‘शब्द’ पाळला जाणार का? हे पाहणे महत्वाचे ठरणार आहे.
माजी नगरसेवकांना फोन
राष्ट्रवादी काँग्रेस पक्षाची आज बारामती हाॅस्टेल येथे महत्त्वपूर्ण बैठक पार पडली. राष्ट्रवादी काँग्रेस कडून जास्तीत जास्त उमेदवार उभे केले जावेत यासाठीची जुळवाजुवळ सुरू झालेली आहे. त्यासाठी उपमुख्यमंत्री अजित पवार हे देखील बारामती हाॅस्टेलमध्ये ठाण मांडून होते. राष्ट्रवादी काँग्रेस शरदचंद्र पवार पक्षातील माजी नगरसेवकांना तसेच महत्त्वाच्या पदाधिकाऱ्यांना राष्ट्रवादी काँग्रेस मधील पदाधिकाऱ्यांनी फोन करून बैठकीला येण्याची निमंत्रण दिले होते. मात्र त्यास नकार देण्यात आला आहे अशी माहिती काही माजी नगरसेवकांनी दिली.
” पुणे महापालिकेची निवडणूक आम्ही पूर्ण 165 जागांवर निवडणूक लढविण्यास आम्ही तयार आहोत पण समविचारी पक्ष एकत्र येणार असतील तर आम्ही आमच्या सोबत घेऊ”
– सुनील टिंगरे, शहराध्यक्ष,राष्ट्रवादी काँग्रेस
जे कोणी भाजप विरोधात निवडणूक लढवण्यास तयार असतील त्यांच्यासोबत कॉमन मिनिमम प्रोग्राम तयार करून एकत्र निवडणूक लढवू निवडणूक झाल्यानंतर भाजपसोबत कोणीही जायचे नाही अशी अट देखील त्यामध्ये मान्य करावी लागेल.”
– अरविंद शिंदे, शहराध्यक्ष, काँग्रेस
” भाजप विरोधात आम्ही समविचारी पक्ष एकत्र लढणार आहोत अजितदादा यांच्या राष्ट्रवादी कांग्रेस सोबत जायचे की नाही यासोबत या संदर्भात प्रदेशाध्यक्षांसोबत बोलून निर्णय घेतला जाईल.”
प्रशांत जगताप शहराध्यक्ष राष्ट्रवादी काँग्रेस शरदचंद्र पवार पक्ष
” महापालिका निवडणुकीमध्ये अजित पवार यांना सोबत घ्यायची की नाही हा पूर्णपणे निर्णय शरदचंद्र पवार यांचा आहे तो जो निर्णय घेतील तो आम्हास मान्य असेल.
गजानन थरकुडे, शहर प्रमुख, शिवसेना उद्धव बाळासाहेब ठाकरे
भाजप विरोधात आम्ही महाविकास आघाडी म्हणून आम्ही निवडणूक लढवत आहोत त्यात राष्ट्रवादी काँग्रेस येणार असेल तर आम्ही त्याचे स्वागत करू
– हेमंत संभूस, सरचिटणीस, मनसे
2017 मधील महापालिकेतील संख्याबळ
भाजप- 99 राष्ट्रवादी काँग्रेस- 42
शिवसेना- 10 काँग्रेस-10
मनसे- 2. एमआयएम-1
एकूण -164
