पुणे ‘विद्येचे माहेरघर की किलिंग सिटी’ असा गंभीर विचार मनात सुरू असताना आणि सलग दोन दिवस दिवसा ढवळ्या भर रस्त्यावर हत्या घडत असतानाच शिवसेना पुणे महानगर नेते रवींद्र धंगेकर यांनी केंद्रीय राज्यमंत्री मुरलीधर मोहोळ यांचे खंदे समर्थक रफिक शेख यांच्याकडून हिंदुत्ववादी कार्यकर्त्याला मारहाण केल्याची पोस्ट केली आणि एकच खळबळ उडाली! प्रत्यक्षात या सर्व घटना घडल्या असल्या तरी सुद्धा याचा खरंच हिंदू मुस्लिम संबंध आहे का? आपापसात भांडणाचे कारण काय? खासदार केंद्रीय राज्यमंत्री मुरलीधर मोहोळ यांचे कार्यकर्ते हिंदुत्ववादी कार्यकर्त्यांवर हल्ले का करत आहेत? या सर्वांचा सखोल अभ्यास करताना धक्कादायक माहिती समोर आली ती म्हणजे यामध्ये खरंच हिंदू-मुस्लीम आहे की राजकीय रंग! पुणे शहरातील गुन्हेगारीच्या खळबळजनक घडामोडीच्या पार्श्वभूमीवर खरे सत्य समाजासमोर येणे गरजेचे! वाचा सविस्तर……
कोथरूड विधानसभा मतदारसंघातील कोथरुड पोलीस स्टेशन अंकित एरंडवणा पोलीस चौकीच्या हद्दीमध्ये दुपारी एकाच सोसायटीमध्ये राहणाऱ्या दोन कुटुंबांमध्ये चारचाकी गाडीखाली फटाके वाजवण्याच्या कारणास्तव किरकोळ वादावादी झाली. गाडीखाली फटाके वाजवले या कारणाचं संबंधित गाडी मालकाच्या महिलेने मुलांना जाब विचारला या किरकोळ कारणावरून तथाकथीत हिंदुत्ववादी कार्यकर्त्यांनी संबंधित महिलांच्या घरी जाऊन दमदाटी केल्याच्या कारणास्तव सुरुवातीला एरंडवणे चौकीमध्ये अदखलपात्र गुन्हा दाखल करण्यात आला. काही तासांमध्येच आपापसामध्ये सामंजस्याने सदरील प्रकरण रद्द करण्यात आल्यानंतर पुन्हा दोन्ही गटांमध्ये बाचाबाची अन मारहाण सुरू झाली. एकाच सोसायटीतील हा प्रकार आपापसातील तक्रारी दाखल केल्या त्यानंतर ही सुरू होता यादरम्यान हितसंबंधातील व्यक्ती म्हणून केंद्रीय राज्यमंत्री मुरलीधर मोहोळ यांचा पदाधिकारी रफिक शेख यांनी सामंजस्याने सदरील प्रकार मिटवण्याचा प्रयत्न केला परंतु स्थानिक विषयांमध्ये बाहेरील लोकांनी लक्ष घालण्याची गरज काय? या एकमेव कारणास्तव रफिक शेख यांनाही मारहाण करण्यात आली असून सध्या त्यांच्यावरही उपचार सुरू आहेत.
भारतीय जनता पक्षाच्या मुख्य पदाधिकाऱ्याला मारहाण झाल्याची घटना समजल्यानंतर दोन गटातील तरुणांमध्ये प्रचंड हाणामारी होऊन मेगा सिटी मध्ये रहिवासी असलेल्या सुरज चव्हाण व सनी चव्हाण यांच्याही डोक्याला इजा झाल्याने त्यांच्यावरही कोथरूडमधील खाजगी रुग्णालयामध्ये उपचार सुरू असून किरकोळ वादावादीचे रूपांतर आता हिंदू मुस्लिम स्तरावर जाऊन राजकीय रंग घेत आहे. त्यातच सध्या पुणे शहरात चर्चेत असलेल्या धंगेकर- मोहोळ या अंकाचा नवीन भाग म्हणून माजी आमदार व शिवसेना नेते रवींद्र धंगेकर यांनी या विषयात उडी घेतल्याने राजकीय रंग सुरू झाले आहेत. कोथरूड भागातीलच गटांमध्ये सुरू झालेला हा वाद पोलिसांच्या सामंजस्याने मिटेल की याला पुन्हा हिंदू मुस्लिम रंग की धंगेकर- मोहोळ किनार लागेल यावर संबंधित गुन्ह्यांचे अस्तित्व राहणार आहे. त्यातच ज्यांच्या संबंधाने रफिक शेख या सोसायटीमध्ये आला त्या राहत्या घराची व दोन वाहनांची तोडफोड करण्यात आली असून याची दखल पोलीसही घेत नाहीत ही मात्र शोकांतिका आहे.
सध्या समाज माध्यमांवर धंगेकर- मोहोळ वादाचा नवीन अंक म्हणून या विषयाची जोरदार चर्चा असून या पोस्ट लाईक आणि शेअर केल्या जात आहेत. दोन्ही पिडीत रुग्णालयामध्ये उपचार घेत असून उपचार पूर्ण झाल्यानंतरच यावरील कायदेशीर कारवाई पुढे सरकणार असतानाच कोथरूड परिसरात मात्र खमंग चर्चा सुरू झाल्या आहेत. किरकोळ वादाचे रूपांतर हिंदुत्ववादी कार्यकर्ता आणि केंद्रीय राज्यमंत्री यांचा समर्थक अशा आवाक्याच्या बाहेर गेल्याने मूळ तक्रार मात्र चिंतेत असून राजकारण जोरात सुरू राहणार हे मात्र नक्की! संबंधित प्रकार कोथरूड विधानसभा मतदारसंघात घडल्यामुळे स्थानिक आमदार चंद्रकांतदादा पाटील व कोथरूड पोलीस स्टेशनचे पोलीस निरीक्षक, पुणे शहर पोलीस हे प्रकरण कसे हाताळतात यावर सर्व गणिते अवलंबून आहेत.
