किरण सोशल फाउंडेशनतर्फे अस्तित्व प्रतिष्ठान वीर गाव या आत्महत्याग्रस्त शेतकरी कुटुंबातील, ऊस तोडणी मजूर, अत्यंत हालाखीची परिस्थिती असणाऱ्या एक पालक असलेल्या मुलांचे गुरुकुल चालवणाऱ्या संस्थेस श्री. श्रीधर म्हैसूरकर परिवार यांच्यातर्फे मदतनिधी देण्यात आला. तसेच कु. अभिर कुलकर्णी याच्या वाढदिवसानिमित्त श्री.पुष्कर व सौ. मुग्धा कुलकर्णी यांच्यातर्फे विविध क्रीडा साहित्य वाटप करण्यात आले. यावेळेस किरण सोशल फाउंडेशनचे पूजा बरकडे, ऋचा देशपांडे, रेणुका सरवदे, स्वप्ना म्हैसूरकर, रवींद्र सरवदे, अजिंक्य देशपांडे, नीलेश कुलकर्णी, अतुल धुमाळ, सुशांत बरकडे इत्यादी सभासद उपस्थित होते.
अस्तित्व प्रतिष्ठानचे पूर्ण काम गीतांजली देगावकर ताई व पल्लवी वाघ ताई या अत्यंत सचोटीने पार पडत आहेत. मूलभूत अन्न, वस्त्र, निवारा याची भ्रांत असणाऱ्या,एक पालक विशेषतः फक्त आई असणाऱ्या अत्यंत गरीब घरातील मुलांना चांगले शिक्षण मिळावे, त्यांना चांगले संस्कार मिळावे, त्यांचा सर्वांगीण विकास व्हावा या हेतूने गीतांजली व पल्लवीताई या निस्वार्थीपणे हे निवासी गुरुकुल चालवतात.
कुठलाही शासकीय निधी मिळत नसतानासुद्धा या संस्थेतील ५५ मुला –मुलींना काहीही कमी पडू न द्यायची काळजी येथे घेतली जाते. समाजातील दानशूर व्यक्तींच्या पाठिंब्यावरच या संस्थेचे पूर्ण कामकाज चालले आहे. तरी आम्ही, किरण सोशल फाउंडेशतर्फे सर्वांना आव्हान करतो, की आपण एकदा येथे भेट देऊन जमेल तशी मदत करावी.
