पुणे शहरात होणाऱ्या वाहतूक कोंडीने त्रासलेल्या नागरिकांकडून आता शहरातील मेट्रोचा वापर वाढत आहे. त्यामुळे मेट्रोतून प्रवास करणाऱ्यांची संख्या प्रत्येक महिन्यात वाढत असून शहरात गेल्या चार महिन्यांत मेट्रोची प्रवासी संख्या २४ लाखांनी वाढली. मेट्रोतून सप्टेंबरमध्ये ७५ लाख प्रवाशांनी प्रवास केला होता. गेल्या महिन्याच्या तुलनेत प्रवासी संख्या ७ लाखांनी वाढली आहे. त्यामुळे महिनाभरातील आतापर्यंतची ही सर्वाधिक प्रवासी संख्या आहे.
‘महामेट्रो’कडून वनाझ ते रामवाडी आणि पिंपरी-चिंचवड ते स्वारगेट या दोन मार्गांवर मेट्रो सेवा सुरू करण्यात आली आहे. या वर्षी मार्चपासून प्रत्येक महिन्यात मेट्रोचे प्रवासी वाढत असल्याचं चित्र आहे. मात्र, जून महिन्यापासून प्रवासी संख्या वेगाने वाढण्यास सुरुवात झाली असून जूनपासून पाऊस सुरू झाल्यामुळे, तसंच पीएमपी तिकीट दरवाढ व कोंडीमुळे प्रवासी मेट्रोकडे वळल्याचं दिसत आहे. त्यात गणेशोत्सवात प्रवासी संख्येचे अनेक उच्चांक झाल्याचे पाहायला मिळाले. विसर्जनाच्या दिवशी मेट्रोतून सर्वाधिक प्रवाशांनी प्रवास केला आहे. त्यामुळे सप्टेंबर महिन्यामध्ये प्रवासी संख्या उच्चांकी झाली. या महिन्यामध्ये मेट्रोला ११ कोटी ७० लाख रुपयांचे उत्पन्न मिळालं आहे.
पुणे मेट्रोतून मार्च महिन्यात ४५ लाखांहून अधिक प्रवाशांनी प्रवास केला होता. मे महिन्यात प्रवासी संख्या ४७ लाखांवर पोहोचली. जुलै महिन्यात ती ५९ लाखांवर गेल्यानंतर ऑगस्टमध्ये ती थेट ६९ लाखांच्या पुढे गेली. सप्टेंबरमध्ये प्रवासी संख्या पाऊण कोटींवर धडकली आहे. त्यामुळे गेल्या चार महिन्यांत मेट्रोची प्रवासी संख्या २४ लाखांनी वाढल्याचं दिसतं. पिंपरी-चिंचवडपासून स्वारगेट मार्गिकेच्या प्रवासीसंख्येत ऑगस्टमध्ये वाढ झाली होती; परंतु सप्टेंबरमध्ये किचिंत घट झाली आहे. मात्र, वनाझ ते रामवाडी मार्गाची प्रवासी संख्या सव्वा लाखांच्या पुढे गेल्याचे दिसून आले आहे.
