भाजपच्या राष्ट्रीय अध्यक्षपदाची सूत्रे नितीन नवीन यांनी आज हाती घेतली. दिल्लीत भाजपच्या मुख्यालयात पार पडलेल्या कार्यक्रमात नितीन नवीन यांच्या अध्यक्षपदाची औपचारिक घोषणा करण्यात आली. यावेळी पंतप्रधान नरेंद्र मोदीसुद्धा उपस्थित होते. पंतप्रधान नरेंद्र मोदींनी नितीन नवीन यांना शुभेच्छा देत अभिनंदन केलं. यावेळी जगातील सर्वात मोठ्या पक्षाचा राष्ट्रीय अध्यक्ष म्हणून निवड झाल्याबद्दल अभिनंदन करतो असं पंतप्रधान मोदी म्हणाले.
पंतप्रधान नरेंद्र मोदींनी म्हटलं की, नितीन नवीन यांना फक्त भाजपच नाही तर एनडीएतील घटक पक्षांसोबतही समन्वय साधायचा आहे. त्यांनी स्वत:ला सिद्ध केलंय. पुढची २५ वर्षे महत्त्वाची असून यात विकसित भारताची निर्मिती करायची आहे आणि हे होणारच आहे. नितीन नवीन हे मिलेनियल आहेत.
आमचं नेतृत्व हे परंपरेनं चालतं आणि ते अनुभवाने समृद्ध असतं. जनसेवा राष्ट्रसेवेचा भाव संघटनेला पुढे नेतो. आम्ही शून्यापासून शिखरापर्यंतचा प्रवास पाहिलाय. भाजपचं जितकं लक्ष संघटनेच्या विस्तारावर आहे तेवढंच लक्ष कार्यकर्त्यांच्या निर्मितीवर आहे. मी मुख्यमंत्री ते पंतप्रधान झालो पण मी भाजपचा कार्यकर्ता राहिलो. मी कार्यकर्ता आहे आणि नितीन नवीन माझे बॉस आहेत असंही पंतप्रधान मोदी म्हणाले.
भाजपच्या राष्ट्रीय अध्यक्षपदासाठी नितीन नवीन यांचा एकमेव अर्ज दाखल झाला होता. त्यामुळे त्यांची या पदावर बिनविरोध निवड झाल्याचे सोमवारीच जाहीर करण्यात आले. अमित शहा, राजनाथ सिंह, जे. पी. नड्डा, नितीन गडकरी, हरदीप पुरी आदी दिग्गज नेत्यांच्या उपस्थितीत नवीन यांनी सोमवारी पक्षाच्या राष्ट्रीय मुख्यालयात अर्ज भरला होता.
कोण आहेत नितीन नबीन?
नितीन नबीन हे बिहारमधील भाजपचे एक कद्दावर नेते म्हणून ओळखले जातात. त्यांचा राजकीय प्रवास थक्क करणारा आहे.
- कौटुंबिक वारसा: नितीन नबीन हे भाजपचे दिवंगत नेते आणि माजी आमदार नवीन किशोर प्रसाद सिन्हा यांचे पुत्र आहेत. वडिलांच्या निधनानंतर २००६ मध्ये त्यांनी सक्रिय राजकारणात प्रवेश केला.
- सलग ५ वेळा आमदार: पाटण्यातील बांकीपूर विधानसभा मतदारसंघातून ते सलग ५ वेळा (२००६, २०१०, २०१५, २०२० आणि २०२५) आमदार म्हणून निवडून आले आहेत.
- मंत्रिपदाचा अनुभव: बिहार सरकारमध्ये त्यांनी रस्ते बांधकाम, नगरविकास आणि गृहनिर्माण यांसारख्या महत्त्वाच्या खात्यांचे मंत्रिपद भूषवले आहे.
- संघटनात्मक कौशल्य: भारतीय जनता युवा मोर्चाचे (BJYM) राष्ट्रीय सरचिटणीस आणि बिहार प्रदेशाध्यक्ष म्हणून त्यांनी काम केले आहे. छत्तीसगड आणि सिक्कीम राज्यांचे प्रभारी म्हणूनही त्यांनी भाजपला मोठे यश मिळवून दिले.
