आयफोन आणि अँड्रॉइड वापरकर्ते करत आहेत ‘धोक्याचा’ सामना, सरकारने दिला इशारा

अ‍ॅपल आयफोन, आयपॅड आणि अँड्रॉइड फोन वापरणाऱ्या वापरकर्त्यांनी सतर्क राहण्याची गरज आहे. भारत सरकारच्या इलेक्ट्रॉनिक्स आणि माहिती तंत्रज्ञान मंत्रालयाच्या अंतर्गत येणाऱ्या इंडियन कॉम्प्युटर इमर्जन्सी रिस्पॉन्स टीमने आयफोन, आयपॅड आणि अँड्रॉइड वापरकर्त्यांसाठी उच्च सुरक्षा इशारा जारी केला आहे. CERT-In च्या मते, iOS, iPadOS, Android 13, 14 आणि 15 ऑपरेटिंग सिस्टममध्ये ही त्रुटी आढळून आली आहे.

कसे होऊ शकते नुकसान?
अ‍ॅपलच्या ऑपरेटिंग सिस्टममधील दोषामुळे काही धोकादायक अ‍ॅप्स तुमच्या डिव्हाइसला हानी पोहोचवू शकतात. हे धोकादायक अॅप्स तुमचे डिव्हाइस अकार्यक्षम बनवू शकतात, ज्यामुळे तुम्हाला डिव्हाइस चालवण्यास त्रास होऊ शकतो. दुसरीकडे, अँड्रॉइड 13, 14 आणि 15 ऑपरेटिंग सिस्टीममधील त्रुटींचा फायदा घेऊन, हॅकर्स तुमच्या डिव्हाइसवर नियंत्रण मिळवू शकतात आणि तुमची वैयक्तिक माहिती चोरू शकतात, सोप्या भाषेत सांगायचे तर डेटा चोरीचा धोका असतो.

हे वापरकर्ते आहेत धोक्यात

• CERT-In च्या मते, iOS 18.3 पेक्षा जुन्या आवृत्त्यांवर चालणारे iPhone XS आणि त्यानंतरचे मॉडेल धोक्यात आहेत.
• 12.9-इंचाचा दुसरा पिढीचा आयपॅड प्रो, 10.5-इंचाचा आयपॅड प्रो आणि iPadOS 17.7.3 पेक्षा जुन्या आवृत्त्यांवर चालणारे सहाव्या पिढीचे आयपॅड मॉडेल देखील धोक्यात आहेत.
• iPadOS 18.3 पेक्षा जुन्या आवृत्त्यांवर चालणारे 13-इंच iPad Pro, 12.9-इंच तिसऱ्या जनरेशनचे, 12.9-इंच, 11-इंच iPad Pro पहिल्या जनरेशनचे आणि त्यापूर्वीचे मॉडेल, iPad Air तिसऱ्या जनरेशनचे आणि त्यापूर्वीचे मॉडेल, iPad 7 व्या जनरेशनचे आणि त्यापूर्वीचे मॉडेल आणि iPad mini 5 व्या जनरेशनचे आणि त्यापूर्वीचे मॉडेल हे सर्व धोक्यात आहेत.

ते टाळण्यासाठी करा या गोष्टी
वापरकर्त्यांची सुरक्षितता आणि गोपनीयता लक्षात घेऊन, Apple ने iOS आणि iPadOS मध्ये आढळलेल्या त्रुटी दूर करण्यासाठी सुरक्षा अपडेट्स आणले आहेत. जर तुम्हाला हॅकर्स किंवा स्कॅमर्सपासून वाचायचे असेल, तर विलंब न करता कंपनीने जारी केलेले सॉफ्टवेअर अपडेट तुमच्या फोनमध्ये डाउनलोड करा आणि इन्स्टॉल करा.

अ‍ॅपल आणि अँड्रॉइड वापरकर्त्यांना फक्त अधिकृत अ‍ॅपल अ‍ॅप स्टोअर आणि गुगल प्ले स्टोअरवरून अ‍ॅप्स डाउनलोड करण्याचा सल्ला देण्यात आला आहे. जर तुम्हाला अॅप स्टोअर किंवा प्ले स्टोअरवर अॅप सापडला नाही, तर थर्ड पार्टी साइट्सवरून एपीके फाइलद्वारे डिव्हाइसवर अॅप इन्स्टॉल करण्याची चूक करू नका. तुमची ही एक चूक तुमचे नुकसान करू शकते.