गल्लीपासून दिल्लीपर्यंत भाजपची सत्ता! मग विरोधातला आवाज असला की त्याच्यावर ठेवली जाणारी पाळत, केल्या जाणारे टार्गेट अन् झुंडशाहीचे वैचारिक हल्ले अंगवळणी पडत असताना पुणे भाजपा शहराध्यक्ष यांच्याबाबत एक धक्कादायक प्रकार समोर आला आहे तो म्हणजे त्यांच्या व्यायाम शाळा घोटाळ्याची चौकशी करा अशी मागणी करणाऱ्या तक्रारदार काँग्रेस कार्यकर्त्यावर 24 तास पाळत ठेवण्याचे काम केले जात आहे. विशेष म्हणजे संबंधित कार्यकर्त्याला आपल्या जीव धोक्यात आल्याची जाणीव झाल्याने तात्काळ पोलीस ठाण्यामध्ये तक्रार देत भाजप वरिष्ठांनाही पत्रव्यवहार करण्यात आला आहे.
पुणे महापालिकेच्या प्रभाग क्रमांक २९ मधील कै भानुदास गेजगे व्यायामशाळा सानेगुरुजी नगर, व लोकमान्य नगर व्यायामशाळा, तसेच कै चंद्रकांत बोत्रे व्यायामशाळा भ्रष्टाचार प्रकरण माहिती अधिकारात अधिकृतपणे माहिती घेऊन उघडकीस आणले. त्यानंतर पुण्यातील अग्रगण्य वृत्तपत्रांनी या विषयाचे गांभीर्य लक्षात घेऊन अनेक वृत्तपत्रांमध्ये बातम्या छापून गंभीर विषयाला वाचा फोडण्याचे काम केले. याच गोष्टीचा राग मनात धरून सध्या भारतीय जनता पक्षाचे शहराध्यक्ष धीरज घाटे यांचे समर्थक कार्यकर्ते लक्ष करत आहेत. कांग्रेस कार्यकर्ते सागर धाडवे यांच्यावर स्थानिक सत्ताधारी नगरसेवकाच्या गुंड प्रवृत्तीच्या लोकांकडून काल सकाळपासून पाळत ठेवण्यात येत असल्याची लेखी तक्रार पुणे पोलिसांना देण्यात आली आहे.
सागर धाडवे यांनी निवेदनात सांगितले आहे की मी सोसायटीच्या बाहेर पडल्यावर अन् व्यक्तिगत कामासाठी बाहेर आल्यावर माझ्या कधी पुढे कधी मागे अनेक वेगवेगळ्या प्रकारचे लोक रागाने पाहत आहेत. माझ्या सोसायटी बाहेरही कालपासून अंदाजे ८ ते १० जणांच्या टोळक्याने मुले उभी राहत असल्याने माझ्या कुटुंबातील सदस्य घाबरले असून मला बाहेर पडण्यास मनाई केली जात आहे.
महाराष्ट्राचे मुख्यमंत्री तथा गृहमंत्री, पुण्याचे पालकमंत्री, पुणे पोलिस आयुक्त, पर्वती पोलिस स्टेशन तसेच हे कृत्य भाजप वरिष्ठांना कळावे मला या भ्रष्टाचारा विरोधातील लढ्यात काही झाल्यास संबंधित सत्ताधारी नगरसेवकासच जबाबदार धरले जावे असे पुण्याचे खासदार केंद्रीय मंत्री मुरलीधर मोहोळ, राज्यसभा खासदार मेधा कुलकर्णी यांनाही त्यांच्या ई-मेलवर संबंधित प्रकाराची माहिती कळविली आहे. स्थानिक पर्वती पोलिस स्टेशनलाही पत्र देऊन कळविले आहे असून लवकरच या गुंडशाही व झुंडशाहीवर कारवाई होईल ही अपेक्षा व्यक्त करण्यात आली आहे. काही महिन्यांपूर्वी ह्याच नगरसेवकाने जेष्ठ पत्रकार निखिल वागळे, वकील असीम सरोदे यांच्यावर हल्ला केला होता. ही प्रवृत्ती समाज्यासाठी, भाजपसाठी धोकादायक आहे त्यामुळे तत्पर कारवाई होईल ही अपेक्षा धाडवे यांनी व्यक्त केली आहे.
