पुण्यात सीसीटीव्ही प्रकल्पासाठी शहरातील जवळपास ६१ रस्त्यांवर खोदकाम केलं जाणार आहे. आधीच वाहतूक कोंडीच्या समस्येचा सामना करणाऱ्या पुणेकरांना आणखी मनस्ताप सहन करावा लागण्याची शक्यता आहे. दरम्यान, पोलिसांनी हे काम ३१ मे पर्यंत पूर्ण करावं अशी तंबीच महापालिकेला दिली असल्याची माहिती समजते.
याबाबत मिळालेली माहिती अशी की, महापालिकेच्या मलनिःसरण विभाग, पाणी पुरवठा विभाग आणि पोलिसांच्या सीसीटीव्ही प्रकल्पासाठी रास्त खोदण्यास वाहतुक पोलिसांनी पुणे महापालिकेला परवानगी दिलीय. वाहतूक पोलिसांनी महापालिकेला कामाची परवानगी दिली असली तरी ही सर्व कामं ३१ मे २०२५ पर्यंत पूर्ण करा असेही आदेश दिलेत. जर ३१ मे पर्यंत काम पूर्ण झालं नाही तर संबंधित ठेकेदारांवर कायदेशीर कारवाई करण्यात येईल असा इशारा पोलिसांनी दिलीय.
पुण्यातील कोथरूड, वारजे, येरवडा, बाणेर, हडपसर, बालेवाडी, बीटी कवडे रोड, कोंढवा, बिबवेवाडी, धानोरी, शिवाजीनगर, सारसबाग या परिसरातील रस्त्यांवर खोदकाम केलं जाणार आहे. यामुळे या भागात वाहतूक कोंडीची शक्यता आहे.
पोलिसांनी सीसीटीव्ही प्रकल्पाच्या या कामाचं वेळापत्रक मागवलं आहे. कोणत्या भागात कधी आणि किती काळ काम चालणार आहे याची माहिती यामध्ये असेल. नियोनानुसार वेळेत काम पूर्ण व्हावं यासाठी प्रशासनाकडूनही लक्ष ठेवलं जाणार आहे.
