रायगडवरील वाघ्या कुत्र्याची समाधी हटवावी अशी मागणी माजी खासदार संभाजीराजे छत्रपती यांनी मुख्यमंत्र्यांना पत्र लिहून केलीय. या समाधीला कोणताच ऐतिहासिक पुरावा नसल्याचं भारतीय पुरातत्व खात्यानंही स्पष्ट केलंय. त्यामुळे ३१ मे पर्यंत ही समाधी हटवावी असं संभाजीराजेंनी पत्रात म्हटलंय. आता यावर इतिहास अभ्यासक इंद्रजित सावंत यांनीही प्रतिक्रिया दिलीय. इतिहासात छत्रपती शिवाजी महाराज यांच्या वाघ्या कुत्र्याचा कुठेच उल्लेख नाही. राम गणेश गडकरींच्या नाटकातून वाघ्या कुत्र्याची निर्मिती झाल्याचं इंद्रजित सावंत म्हणाले.
वाघ्या कुत्र्याचं स्मारक हे कपोलकल्पित आहे. इतिहिसात याची कोणतीही नोंद नाहीय. इतिहास आणि दस्ताऐवजात कोणतीही नोंद नाही तरी त्या स्मारकाला संरक्षण देण्यात येतंय. वाघ्या कुत्र्याचं स्मारक करून छत्रपती शिवाजी महाराजांना कमी लेखण्याचा काहींचा प्रयत्न होता अशी प्रतिक्रिया इंद्रजित सावंत यांनी दिली.
वाघ्या कुत्र्याचा विषय कुठून आला याबाबत बोलताना इंद्रजित सावंत म्हणाले की, राम गणेश गडकरी यांच्या एका नाटकातून वाघ्या कुत्र्याची निर्मिती झाली. वाघ्या कुत्र्याच्या स्मारकाबद्दल संभाजीराजे छत्रपती यांनी केलेली मागणी योग्य आहे.
रायगडावरील छत्रपती शिवाजी महाराजांच्या समाधी शेजारीच कथित वाघ्या कुत्र्याची समाधी आहे. या समाधीला कोणताही ऐतिहासिक आधार नसल्याचं सांगत याआधी अनेकवेळा शिवप्रेमींनी विरोध केलाय. वाघ्या कुत्र्याचा पुतळा शिवप्रेमींनी हटवलासुद्धा होता. मात्र प्रशासनाकडून तो पुन्हा बसवण्यात आला. आता त्या पुतळ्याला पोलिसांचं संरक्षणही देण्यात आलंय.
