शिमला : देशभरात रंगपंचमी, धुळवडीचा उत्साह आहे. सर्वत्र धुळवड साजरी केली जात असताना अतिशय धक्कादायक घटना समोर आली आहे. माजी काँग्रेस आमदार बंबर ठाकूर यांच्यावर हल्ला झाल्याची माहिती आहे. त्यांच्यावर गोळीबार करण्यात आला, या गोळीबारात त्यांच्या पायाला गोळी लागली. या गोळीबारात काँग्रेसचे माजी आमदार ठाकूर यांचे पीएसओ संजीव कुमार हेही जखमी झाले आहेत.
हिमाचल प्रदेशमध्ये होळी, रंगपंचमीच्या दिवशी माजी काँग्रेस आमदार बंबर ठाकूर यांच्यावर गोळीबार झाला. बंबर ठाकूर काँग्रेसचे नेहमीच चर्चेत राहणारे माजी आमदार आहेत. आधी अनेक वादात त्यांचं नावही आलं आहे. बिलासपूरमध्ये माजी आमदार बंबर ठाकूर यांच्या घरावर एकूण १३ राउंड फायर केल्याचं पोलिसांच्या प्राथमिक तपासात समोर आलं आहे. याप्रकरणी पोलिसांकडून पुढील कारवाई सुरू आहे.
नेमकं काय घडलं?
गोळीबाराची घटना माजी आमदाराच्या घराजवळच घडली. यात ठाकूर आणि पीएसओ संजीव कुमार यांच्या पाठीत, पोटात गोळी लागली. ठाकूर यांच्यावर सुरुवातीला बिलासपूरमध्ये उपचार करण्यात आले आणि नंतर त्यांना पुढील वैद्यकीय उपचारासाठी आयजीएमसी शिमला इथे पाठवण्यात आलं आहे, तर त्यांच्या पीएसओला गंभीर अवस्थेत एम्स बिलासपूरमध्ये दाखल करण्यात आलं आहे. तसंच या गोळीबारात माजी आमदार आणि त्यांच्या पीएसओशिवाय आणखी काही लोक जखमी झाले आहेत. त्यांच्यावरही उपचार सुरू आहेत.
माजी आमदाराच्या मुलाने दिली गोळीबाराच्या घटनेची माहिती
काँग्रेस माजी आमदार बंबर ठाकूर यांच्यावर गोळीबार झाल्याची घटना तात्काळ पोलिसांना देण्यात आली. त्यानंतर पोलिसांनी तात्काळ हल्लेखोरांचा शोध घेण्यासाठी, तसंच त्यांना अटक करण्यासाठी एक टीम तैनात केली आहे. बंबर ठाकूर यांचा मुलगा ईशान सिंहने फेसबुक पोस्ट केली आहे. या पोस्टमध्ये त्यांनी गोळीबाराच्या घटनेची माहिती दिली आहे. आपल्या वडिलांवर गोळीबार झाला आहे. यात त्यांना गोळी लागली असून त्यांच्यावर उपचार सुरू आहेत, अशी माहिती सोशल मीडिया पोस्टद्वारे त्यांच्या मुलाने दिली आहे.
