राष्ट्रवादी काँग्रेस शरदचंद्र पवार पक्षाच्या शहरातील काही पदाधिकाऱ्यांनी आणि कार्यकर्त्यांनी पुणे मेट्रोच्या रुळावर उतरून आंदोलन केले. या अनपेक्षित आंदोलनामुळे मेट्रोची वाहतूक व्यवस्था पूर्णपणे कोलमडली, परिणामी प्रवाशांना मोठ्या अडचणींचा सामना करावा लागला. नागरिकांनी या प्रकारावर तीव्र संताप व्यक्त केला. पोलिसांनी तात्काळ कारवाई करत आंदोलनकर्त्यांना ताब्यात घेतले, तर पक्षाने त्यांची तात्काळ हकालपट्टी केली.
शिवाजीनगर कोर्ट येथून पुढे वनाजच्या दिशेने जाणाऱ्या मेट्रोच्या फेऱ्या अचानक रद्द करण्यात आल्या. त्यामुळे मेट्रोने प्रवास करणाऱ्या नागरिकांना शिवाजीनगर मेट्रो स्टेशनवर उतरवण्यात आले. त्यानंतर रामवाडीहून आलेल्या प्रवाशांना शिवाजीनगर कोर्ट येथे उतरून पुढील प्रवासासाठी रिक्षा आणि कॅबचा पर्याय शोधावा लागला. अशीच परिस्थिती छत्रपती संभाजी उद्यान स्टेशनवरील प्रवाशांचीही झाली. त्यांना तेथून पुढे रामवाडीच्या दिशेने मेट्रोने प्रवास करता आला नाही.
प्रवाशांना कोणतीही माहिती देण्यात आली नव्हती
मेट्रोकडून याबाबत प्रवाशांना कोणतीही माहिती देण्यात आली नव्हती. त्यामुळे आपल्या कामाच्या ठिकाणी वेळेवर पोहोचण्याच्या घाईत असलेल्या प्रवाशांना मोठ्या अडचणींचा सामना करावा लागला. तब्बल तासभर हा गोंधळ सुरू होता, ज्यामुळे नागरिकांमध्ये मोठ्या प्रमाणात संताप निर्माण झाला होता.
रोजगार मिळत नसल्यासह विविध मागण्यांसाठी आंदोलन
दरम्यान, राष्ट्रवादी काँग्रेस (NCP) पक्षाच्या काही कार्यकर्त्यांनी आणि पदाधिकाऱ्यांनी तरुणांना रोजगार मिळत नसल्यासह विविध मागण्यांसाठी महापालिका मेट्रो स्थानकाच्या रुळावर उतरून आंदोलन केले. यावेळी मेट्रोसह अन्य ठिकाणी स्थानिक तरुणांना संधी दिली जात नसल्याचा आरोप करत मोठ्या प्रमाणात घोषणाबाजी करण्यात आली.
अग्निशमन दलाला देखील पाचारण
आंदोलकांना मेट्रोच्या रुळांवरून हटवण्यासाठी पोलिसांनी प्रयत्न केले तसेच अग्निशमन दलाला देखील पाचारण करण्यात आले. हे आंदोलन धोकादायक पद्धतीने होत असल्याने अग्निशमन दलाच्या अधिकाऱ्यांनी सुरक्षेची विशेष काळजी घेतली. अखेर पोलिसांनी आंदोलकांची समजूत काढत त्यांना रुळांवरून बाजूला केले आणि ताब्यात घेतले.
आंदोलनकर्त्यांच्या प्रमुख मागण्या
आंदोलनकर्त्यांनी अनेक महत्त्वपूर्ण मागण्या मांडल्या, त्यामध्ये पुढील मुद्दे विशेषत्वाने उपस्थित करण्यात आले:
- सुशिक्षित पदवीधर बेरोजगारांना रोजगार मिळायलाच हवा.
- प्रत्येक शाळेमध्ये छत्रपती शिवाजी महाराज, महाराणा प्रताप, महात्मा ज्योतिबा फुले, लोकमान्य टिळक, सरदार वल्लभभाई पटेल, झाशीची राणी, डॉ. बाबासाहेब आंबेडकर, भगतसिंग, राजगुरू, सुखदेव यांचा इतिहास शिकवला गेला पाहिजे.
- शाळा आणि शिक्षणाचा वाढता व्यावसायिकीकरण रोखला गेला पाहिजे.
- प्रत्येक तरुण-तरुणीला स्वसंरक्षणासाठी लाठी- काठीचे प्रशिक्षण मिळाले पाहिजे.
- महिलांवरील सर्व प्रकारचे लैंगिक अत्याचार पूर्णतः थांबले पाहिजेत.
- शाळा आणि महाविद्यालयामध्ये शिक्षण पूर्णतः मोफत करावे.
- शासकीय रुग्णालयांमधील भ्रष्टाचार पूर्णतः बंद झाला पाहिजे.
- संपूर्ण महाराष्ट्रातील शासकीय रुग्णालयांमध्ये औषधांसह मोफत वैद्यकीय सेवा उपलब्ध करून द्यावी.
- जिल्हाधिकारी कार्यालय, महानगरपालिका, नगरपालिका आणि इतर शासकीय कार्यालयांमध्ये सामान्य नागरिकांना त्वरित सेवा मिळावी आणि त्यांच्याशी सन्मानपूर्वक वागणूक दिली गेली पाहिजे.
- शासकीय निधीचा वापर हा केवळ सामान्य जनतेच्या हितासाठीच झाला पाहिजे.
- राजकारणातील घराणेशाही पूर्णतः बंद झाली पाहिजे.
या सर्व मागण्यांसाठी आंदोलनकर्त्यांनी जोरदार घोषणाबाजी केली आणि प्रशासनाने लवकरात लवकर यावर निर्णय घ्यावा, अशी मागणी केली.
आंदोलन करणाऱ्या नरेंद्र पावटेकरांची पक्षातून तात्काळ हकालपट्टी
या संदर्भात माहिती देताना राष्ट्रवादी काँग्रेस (शरदचंद्र पवार गट) पक्षाचे नेते प्रशांत जगताप म्हणाले, “नरेंद्र पावटेकर हे कसबा विधानसभा मतदारसंघातील कार्यकर्ते होते. त्यांनी तीन महिन्यांपूर्वी पक्षात प्रवेश केला होता. मात्र, प्रवेशानंतर त्यांनी पक्षाच्या कोणत्याही आंदोलनात किंवा कार्यक्रमात सहभाग घेतलेला नव्हता. अशा परिस्थितीत रविवारी त्यांनी पुणे मेट्रोच्या विरोधात आंदोलन केले. आंदोलन करताना पोलिसांशी हुज्जत घालणे तसेच पुणेकरांच्या दैनंदिन वाहतुकीत अडथळा निर्माण करणे या प्रकारचे कृत्य त्यांनी केले, जे पूर्णपणे निषेधार्ह आहे.”
“आजचे त्यांचे आंदोलन हे वैयक्तिक होते आणि त्याचा पक्षाशी कोणताही संबंध नाही. शिवाय, पुणेकरांना अडवणे आणि पोलिसांसोबत वाद घालणे यासारख्या गोष्टी पक्षाच्या शिस्तीच्या विरोधात आहेत. त्यामुळे पक्षाने निर्णय घेत त्यांच्या तात्काळ हकालपट्टीची कारवाई केली आहे,” असेही प्रशांत जगताप यांनी स्पष्ट केले.
