पुणे, प्रतिनिधी : पुणे महानगरपालिका निवडणुकीत प्रभाग क्रमांक ३८ (ड) मधून शिवसेना पक्षाच्या अधिकृत उमेदवार म्हणून अँक्टिव्ह फाउंडेशनच्या संस्थापक अध्यक्ष व शासन नियुक्त नगरसेवक श्रीकांत मारुती लिपाणे यांच्या पत्नी सौ प्राजक्ता श्रीकांत लिपाणे यांनी आज आपला उमेदवारी अर्ज दाखल केला.
या वेळी परिसरातील नागरिक, शिवसैनिक, महिला कार्यकर्त्या, युवक तसेच सामाजिक कार्यकर्ते मोठ्या संख्येने उपस्थित होते. “प्रत्येक घरासाठी… घरातील प्रत्येकासाठी” या ब्रीदवाक्यावर गेल्या अनेक वर्षांपासून सुरू असलेल्या सामाजिक व विकासात्मक कार्याचा विश्वास नागरिकांच्या उपस्थितीतून स्पष्टपणे दिसून आला.
अँक्टिव्ह फाउंडेशनच्या माध्यमातून गेल्या अनेक वर्षांपासून प्रभाग ३८ परिसरात सामाजिक, शैक्षणिक, आरोग्य, महिला सक्षमीकरण, युवक विकास आणि आपत्ती व्यवस्थापनाच्या क्षेत्रात सातत्याने कार्य सुरू आहे. या कार्यामध्ये श्रीकांत मारुती लिपाणे यांनी शासन नियुक्त नगरसेवक म्हणून कमी कालावधीत कोट्यवधी रुपयांचा निधी आणून अंतर्गत रस्ते, पाणीपुरवठा, सार्वजनिक सुविधा यांसाठी उल्लेखनीय कामे मार्गी लावली आहेत
मा. माजी मंत्री व विद्यमान आमदार आदरणीय विजय बापू शिवतारे यांच्या मार्गदर्शनाखाली मुख्यमंत्री ग्रामसडक योजनेंतर्गत महाराष्ट्रातील पहिला ४ किमी सिमेंट काँक्रीट रस्ता, ५४ कोटींचा जलशुद्धीकरण प्रकल्प, प्रभागातील विविध अंतर्गत रस्त्यांचे काँक्रिटीकरण, बस थांबे, ज्येष्ठ नागरिकांसाठी विरंगुळा केंद्र, महिला व युवकांसाठी विविध उपक्रम राबविण्यात आले आहेत.
सौ प्राजक्ता लिपाणे यांच्या उमेदवारीमुळे महिला नेतृत्वाला बळ मिळणार असून, सामाजिक जाणिवेतून विकासाची दिशा अधिक सक्षमपणे पुढे नेण्याचा संकल्प व्यक्त करण्यात आला आहे. महिलांचे प्रश्न, कुटुंबकेंद्रित विकास, सुरक्षितता, आरोग्य व शिक्षण या विषयांना प्राधान्य देत प्रभागाचा सर्वांगीण विकास साधण्याचा निर्धार यावेळी व्यक्त करण्यात आला.
उमेदवारी अर्ज दाखल करताना परिसरातील नागरिकांनी “सेवेला मत, विकासाला साथ” अशा घोषणा देत उत्स्फूर्त पाठिंबा दर्शविला. ही निवडणूक केवळ सत्ता मिळविण्यासाठी नसून, सामान्य नागरिकांच्या प्रश्नांसाठी आणि विश्वासाच्या बळावर विकास साधण्यासाठी असल्याची भावना यावेळी प्राजक्ता श्रीकांत लिपाणे यांनी माध्यमांशी बोलताना व्यक्त केली.
