बीड जिल्ह्याच्या केज तालुक्यातील मस्साजोग गावचे सरपंच संतोष देशमुख यांच्या हत्येला एक महिन्यापेक्षा जास्त कालावधी उलटून गेला आहे. मस्साजोगचे सरपंच संतोष देशमुख हत्या प्रकरणात रोज नवनीन घडामोडी घडत आहेत. काल संतोष देशमुख यांचे बंधु धनंजय देशमुख यांनी पाण्याच्या टाकीवर चढून आंदोलन केलं होतं. आज खंडणीच्या गुन्ह्यात आरोपी असलेल्या वाल्मिक कराड यांच्या समर्थकांचे आंदोलन सुरु आहे. या आंदोलनादरम्यान एका समर्थकाला भोवळ आल्याची धक्कादायक घटना घडली आहे.
वाल्मिक कराडला आज कोर्टात हजर केले जाणार आहे. त्यामुळे सध्या बीडमधील परळीत वातावरण तापले आहे. त्यातच आज सकाळपासून वाल्मिक कराडची आई पारुबाई कराड परळी पोलीस ठाण्याबाहेर ठिय्या आंदोलन करत आहे. माझा मुलगा निर्दोष आहे, त्याला सोडा. त्याचा याप्रकरणाशी काही संबंध नाही, असं पारुबाई कराड यांनी म्हटले. ‘माझ्या मुलाला न्याय द्या’ असं म्हणत त्या परळी पोलीस ठाण्याबाहेर ठिय्या आंदोलनाला बसल्या आहेत.
तर दुसरीकडे वाल्मिक कराडच्या समर्थक हे रस्त्यावर उतरुन आक्रमकपणे आंदोलन करत आहेत. वाल्मिक कराड समर्थकांनी एक टॉवरवर चढून आक्रमकपणे आंदोलन सुरु केले आहे.
