कमी वेळात दाम दुप्पट.. कमी पैशात जास्त व्याजदर वगैरे या योजना खऱ्या अर्थाने फसव्या असतात. पण असं असूनही शिकले सवरलेले लोकं यात फसतात. पैसे दुप्पट करण्याच्या नादात आहे ते गमवून बसतात. अशी अनेक उदाहरणं भुतकाळात घडली आहेत. पण तरीही या मायाजाळात अनेकांची फसवणूक होत असते. असाच एक फसवणुकीचा प्रकार गुजरातमधून समोर आला आहे. या प्रकरणी गुजरात सीआयडी चार क्रिकेटपटूंना समन्स पाठवणार असल्याचं बोललं जात आहे. रिपोर्टनुसार, शुबमन गिल, राहुल तेवतिया, मोहित शर्मा आणि साई सुदर्शन 450 कोटींच्या चिट फंड स्कॅममध्ये अडकल्याचं दिसत आहे. 450 कोटींचा स्कॅम गुजरातच्या बीझेड ग्रुपशी निगडीत आहे. बीझेड ग्रुपने गुंतवणूकदारांना बँकेपेक्षा जास्त व्याज दर देण्याचा आश्वासन दिलं होतं. पण जेव्हा त्यांची फसवणूक झाली तेव्हा त्यांनी पोलिसात धाव घेतली.
अहमदाबाद मिररच्या रिपोर्टनुसार, गुजरात टायटन्सच्या या खेळाडूंनी पॉन्झी स्किममध्ये पैशांची गुंतवणूक केली आहे. यात गिलने 1.95 कोटींची गुंतवणूक केल्याचं समोर येत आहे. तर इतर खेळाडूंनी कमी अधिक प्रमाणात यात गुंतवणूक केल्याचंही सांगितलं जात आहे. गुजरात सीआयडीने या प्रकरणात एक अटक केली आहे. गेल्या महिन्यात त्यांनी बीझेड ग्रुप घोटाळ्याशी संबंधित भूपेंद्रसिंग झाला याला मेहसाणा जिल्ह्यातून अटक केली आहे. भूपेंद्र सिंगने क्रिकेटपटूंची नावं घेतल्याने हे प्रकरण आणखी तापलं आले. त्याने पोलिसांना सांगितले की, आजपर्यंत त्याने गुजरात टायटन्सच्या खेळाडूंनाही इंटरेस्ट दिला नाही. इतकंच क्रिकेटपटूंनी केलेली गुंतवणूक परत करण्यात अपयशी ठरल्याचं सांगितलं आहे. त्याच्या जबाबानंतर क्रिकेटपटूंच्या अडचणीत वाढ होताना दिसत आहे.
गुजरात सीआयडी अधिकाऱ्यांनी सांगितले आहे की, सध्या सुरू असलेल्या तपासात खेळाडूंचे सहकार्य महत्त्वाचे ठरेल आणि प्रकरण जसं पुढे जाईल तसं पुढील घडामोडी अपेक्षित आहेत. शुबमन गिल सध्या ऑस्ट्रेलिया दौऱ्यावर आहे. त्यामुळे मायदेशी परतल्यानंतर त्याला समन्स पाठवला जाईल, असं सीआयडी अधिकाऱ्याने सांगितलं आहे.
भूपेंद्रसिंह झाला हा साबरकांठा येथील हिम्मतनगर शहरातील रहिवासी आहे. त्याने 2020 ते 2024 या कालावधीत राज्यभरात स्थापन केलेल्या 17 कार्यालयांमधून 11000 गुंतवणूकदारांकडून 450 कोटी रुपये गोळा केले असल्याची पोलिसांची माहिती आहे. गिल आणि इतर तीन क्रिकेटपटू या 11000 गुंतवणूकदारांमध्ये असल्याचे सांगितलं जात आहे.
