केंद्रीय गृहमंत्री अमित शाह हे माजी केंद्रीय मंत्री शरद पवार यांच्या भेटीसाठी त्यांच्या निवासस्थानी गेले आहेत. सकाळीच उपमुख्यमंत्री अजित पवार यांनी शरद पवार यांची भेट घेतली होती. त्यानंतर अजित दादांनी दिल्लीत अमित शाह यांची भेट घेतली. आणि त्यापाठोपाठ अमित शाह हे शरद पवार यांच्या भेटीला आले आहेत. शरद पवार यांचा वाढदिवस असल्याने त्यांना शुभेच्छा देण्यासाठी अमित शाह आले असल्याचं सांगिलं जात आहे. मात्र दिल्लीच्या थंडीत राजकारण तर तापणार नाही ना? अशी चर्चा या निमित्ताने रंगली आहे.
राजकीय वर्तुळात भेटीची चर्चा
नुकतीच विधानसभेची निवडणूक पार पडली, या निवडणुकीत महायुतीला राज्यात स्पष्ट बहुमत मिळालं. 132 जागा जिंकूण भाजप हा सर्वात मोठा पक्ष ठरला. तर राष्ट्रवादी अजित पवार गटाला 41 आणि शिवसेना शिंदे गटाला 57 जागा मिळाल्या, या निवडणुकीत महाविकास आघाडीला पराभवाचा मोठा धक्का बसला. महाविकास आघाडीत राष्ट्रवादी शरद पवार गटाला अवघ्या दहा जागांवर समाधान मानावं लागलं. या निवडणुकीत सत्ताधारी आणि विरोधकांमध्ये आरोप-प्रत्यारोपाचं राजकारण चांगलंच रंगलं होतं. निवडणुकीनंतर देखील शरद पवार यांच्याकडून ईव्हीएमवर शंका उपस्थित करण्यात आली, तर त्याला भाजप नेत्यांकडून देखील चोख प्रत्युत्तर देण्यात आलं. मात्र आता भाजप नेते आणि केंद्रीय गृहमंत्री अमित शाह यांनी शरद पवार यांची भेट घेतली आहे.
शरद पवार यांचा वाढदिवस असल्यानं त्यांना शुभेच्छा देण्यासाठी ही भेट असल्याचं बोललं जात आहे. मात्र या भेटीमुळे राजकीय वर्तुळात चर्चेला उधाण आलं आहे. आज अजित पवार यांनी देखील शरद पवार यांची भेट घेतली. दोन्ही नेत्यांमध्ये जवळपास 20 मिनिटे चर्चा झाली. नेमकी काय चर्चा झाली हे अद्याप गुलदस्त्यात आहे. यावर प्रतिक्रिया देताना शिवसेना शिंदे गटाचे नेते संजय शिरसाट यांनी भविष्यात काय घडेल काही सांगता येत नाही, अशी प्रतिक्रिया दिली होती, आणि त्यानंतर आता अमित शाह यांनी शरद पवार यांची भेट घेतल्यानं या भेटीची चर्चा रंगली आहे.
