डॉक्टर व रुग्ण यांचे नाते कुटुंबातील सदस्यांसारखं आहे. परंतु गेल्या काही वर्षांपासून डॉक्टर असुरक्षित जीवन जगत आहेत. त्यांना सुरक्षित जीवन मिळवून देण्यासाठी कोथरूड विधानसभा मतदारसंघातील महाविकास आघाडीचे उमेदवार चंद्रकांत मोकाटे यांनी प्रयत्न करावेत अशी अपेक्षा कोथरूड विधानसभा मतदारसंघातील डॉक्टरांनी श्री मोकाटे यांच्याकडे आपली मनोगते व्यक्त करताना केली.
डॉ रविकिरण शाह व ऍड राजेंद्र देशमुख यांनी कर्वेनगर येथे काकडे सिटीजवळ आयोजित केलेल्या स्नेहमेळाव्यात महाविकास आघाडीचे उमेदवार चंद्रकांत मोकाटे यांचे स्वागत करून कोथरूड व कर्वेनगर परिसरातील डॉक्टरांनी आपली मनोगत व्यक्त केली. डॉ रविकिरण शाह आपल्या भाषणात म्हणाले की. श्री मोकाटे यांनी त्यांच्या कारकिर्दीत कोथरूड येथे बिंदूमाधव ठाकरे हे 6 मजली हॉस्पिटल बांधले. परंतु गेल्या 10 वर्षापासून हे हॉस्पिटल बंदच आहे.
करोनाच्या काळात गरज असताना हे हॉस्पिटल रुग्णासाठी चालू केले नाही. त्याकाळात या परिसरातील नागरिक व रुग्णांचे उपचाराअभावी हाल झाले. हे हॉस्पिटल चालू केले असते तर रुग्ण बऱ्यापैकी बचावले असते.
डॉ अभिजित मोरे यांनी बोलताना भिती व्यक्त केली की कोथरूड परिसरात डॉक्टरांचे जीवन असुरक्षित आहे. त्यांना संरक्षण मिळण्यासाठी प्रयत्न होण्याची गरज आहे.
श्री मोकाटे यांनी सांगितलं की मी आमदार असताना कोथरूड व आजूबाजूच्या परिसराची गरज लक्षात घेऊन बिंदूमाधव ठाकरे रुग्णालय उभारले. गेली 10 वर्ष ते बंदच आहे. मी निवडून आल्यानंतर सर्वप्रथम चालू करणार असल्याचे आमदार चंद्रकांत मोकाटे यांनी सांगितले.
