राजधानी साताऱ्यात श्रीमंत छत्रपती उदयनराजे समर्थकांच्या आक्रमक भूमिकेमुळे भाजपने अखेर सातारा लोकसभेसाठी उदयनराजे भोसले यांची उमेदवारी निश्चित केली आहे. गेल्या अनेक दिवसांपासून सातारा लोकसभेच्या जागा वाटपावरून महायुतीमध्ये मोठा पेच निर्माण झाला होता. मात्र, अखेर महायुतीमध्ये सातारच्या लोकसभेच्या जागेवर खासदार उदयनराजे भोसले भाजपच्या कमळ चिन्हावर लढणार असल्याचे एकमत झाले आहे.
सातारा लोकसभा मतदारसंघातील उमेदवारीला भाजपचे हायकमांड व केंद्रीय मंत्री अमित शाह यांनी हिरवा कंदील दिल्याने दिल्लीतील आपला मुक्काम आटोपून खासदार उदयनराजे भोसले आज साताऱ्यात येत आहेत. त्यांच्या स्वागताची त्यांच्या समर्थकांनी जय्यत तयारी केली आहे. ठिकठिकाणी पोस्टर्स, बॅनर्स तसेच स्वागतासाठी पुष्पवृष्टी करण्यासाठी जेसीबींचे बुकिंग केले आहे. साताऱ्यात आल्यानंतर उदयनराजे यांच्यावर २५ जेसीबींमधून पुष्पवृष्टी करण्यात येणार असून, यानंतर दोन क्रेनच्या मदतीने भलेमोठे दोन हार घालून त्यांचे स्वागत करण्यात येणार आहे.
खासदार उदयनराजे भोसले यांना सातारच्या लोकसभेची जागा भाजपच्या कोट्यातून सोडल्याबद्दल राष्ट्रवादी अजित पवार गटाला खासदार उदयनराजे भोसले यांची शिल्लक दोन वर्षाची राज्यसभेची रिक्त होणारी जागा देण्याचं ठरलं आहे. त्यामुळे राज्यसभेच्या बदल्यात सातारची जागा राष्ट्रवादी अजित पवार गटाने भाजपला दिल्याचे आता स्पष्ट झाले आहे. तसेच साताऱ्याच्या राष्ट्रवादी काँग्रेस अजितदादा पवार गटाच्या जागेच्या बदल्यात नाशिकची जागा राष्ट्रवादी काँग्रेस देण्यावर चर्चा झाली असून अशी जागा राष्ट्रवादीला सोडण्यात आले आहे.
गेल्या अनेक दिवसाचा सातारा लोकसभा जागेचा पेच आता संपला आहे. खासदार उदयनराजे भोसले यांनी आपल्या पक्षातील ताकदीचा वापर करत पुन्हा एकदा भाजपचे तिकीट खेचून आणले आहे.
उदयनराजे भोसले आज पक्षाची तिकीट घेऊन सातारा जिल्ह्यात प्रवेश करत असून, त्यांचे जंगी स्वागत करण्यासाठी हजारो कार्यकर्ते नीरा नदीच्या पुलावर एकवटले आहेत. महायुतीतील अनेक वाटाघाटीनंतर खासदार उदयनराजे भोसले यांना भाजप चिन्हावरच निवडणूक लढण्याची संधी मिळाल्याने सातारा जिल्ह्यातील उदयनराजे समर्थकांमध्ये मोठा उत्साह पाहायला मिळत आहे. आज सातारा जिल्ह्यात विविध ठिकाणी खासदार उदयनराजे भोसले यांचे याच पार्श्वभूमीवर जंगी स्वागत केले जाणार आहे.
पुणे येथून येणाऱ्या खासदार उदयनराजे यांच्या स्वागतासाठी समर्थक कामाला लागले असून, ‘आरंभ है प्रचंड…’ या मथळ्याखाली सोशल मीडियावर पोस्ट व्हायरल केल्या आहेत. शिरवळ येथील नीरा नदी पूल येथे जिल्ह्याच्या सीमेवर उदयनराजे यांचे स्वागत करण्यात येणार आहे. त्यानंतर शिरवळ बस स्थानक, लोणंद फाटा, खंडाळा बस स्थानक, वेळे, सुरूर फाटा, कवठे येथील किसन वीर पुतळा परिसर, भुईंज, पाचवड फाटा, उडतरे, आनेवाडी, बाँबे रेस्टॉरंट चौक, जिल्हा परिषद चौक येथे स्वागत स्वीकारल्यानंतर ते पोवई नाका येथील छत्रपती शिवाजी महाराज पुतळा परिसर, यशवंतराव चव्हाण किसन वीर पुतळ्यास अभिवादन करणार आहेत. येथून गोलबागेतील थोरले प्रतापसिंह महाराज यांच्या पुतळ्यास अभिवादन करून जलमंदिर येथे दाखल होणार आहेत.
