पुणे : लोकसभा निवडणुकीला अवघे काही दिवस शिल्लक असताना पुण्यामध्ये मात्र भाजपचा उमेदवार काही केल्या ठरत होत नाही. भाजपमधून माजी आमदार जगदीश मुळीक आणि माजी महापौर मुरलीधर मोहोळ यांच्यामध्ये उमेदवारी मिळवण्यासाठी जोरदार स्पर्धा सुरू असताना आता मुरलीधर मोहोळ यांचं पारड उमेदवारी मिळवण्यासाठी जड दिसत आहे. भाजप नेतृत्वाकडून मोहोळ यांना तयारीला लागण्याचे आदेशही देण्यात आल्याचं वृत्त आहे. मोहोळ यांच्या उमेदवारीची कुणकुण लागताच भाजपचे दुसरे इच्छुक जगदीश मुळीक यांनी थेट मुंबई गाठत भाजपचे राज्यातील सर्वोच्च नेते तथा उपमुख्यमंत्री देवेंद्र फडणवीस यांची भेट घेतली. देवेंद्र फडणवीस यांच्या भेटीत आपण लोकसभा निवडणूक लढवण्यासाठी कसे उजवे आहोत हेच जगदीश मुळीक यांनी फडणवीस यांना सांगितल्याची माहिती सूत्रांनी दिली.
दरम्यान, आज सकाळीच पुणे महापालिकेच्या आवारात मुरलीधर मोहोळ यांच्या विरोधात जोरदार बॅनरबाजी करण्यात आली होती. ‘स्टँडिंग कमिटीचं अध्यक्षपद दिलं, महापौर केलं, पक्षाचा सरचिटणीस बनवलं. खासदारकी पण देणार? आता बस झालं… तुला नक्की पाडणार’ अशा आशयाचे बॅनर पुणे महानगरपालिका आवारात लावण्यात आले होते. हे बॅनर लावल्यानंतर भाजपमधील अंतर्गत गटबाजी चव्हाट्यावर आली असल्याची जोरदार चर्चा सुरु आहे. मुळीक आणि मोहोळ यांच्या वादाला पक्षांतर्गत संघर्षाची किनार देखील आहे. महापौर केलं, सरचिटणीस बनवलं, खासदारकी ही तुलाच देणार? आता बस झालं,तुला नक्कीच पाडणार, मोहोळ यांना कुणाचा इशारा?
मुळीक vs मोहोळ: पक्षांतर्गत संघर्षाची किनार
दोघेही लोकसभेसाठी इच्छुक असून गेली दीड ते दोन वर्षांपासून ते तयारी करत आहेत. उमेदवारी मिळावी म्हणून दोघांनीही आपली सगळी ताकद पणाला लावली आहे. यामध्येच या दोन्ही नेत्यांमध्ये असणारा सुप्त संघर्ष देखील वाढीला लागला आहे. गेल्या काही महिन्यांपासून या दोन्ही नेत्यांमध्ये पुणे शहरात जोरदार इव्हेंट वॉर देखील पाहायला मिळाला. पुण्याची लोकसभा लढवण्यासाठी आपणच कसे उजवे हे दाखवण्यासाठी मुळीक आणि मोहोळ त्यांनी सर्वतोपरी प्रयत्न केले. अगदी वरिष्ठ नेत्यांना दाखवण्यापासून ते गर्दी जमवण्यापर्यंत सगळेच प्रयत्न या दोन्ही नेत्यांनी केला.
आपणच उजवे, मुळीकांनी फडणवीसांना पटवून दिलं!
सध्या मिळालेल्या माहितीनुसार, जगदीश मुळीक यांची दावेदारी मागे पडून मुरलीधर मोहोळ यांचं तिकीट फिक्स होण्याची शक्यता आहे. याची कुणकुण लागताचं जगदीश मुळीक यांनी थेट मुंबई गाठून उपमुख्यमंत्री देवेंद्र फडणवीस यांची भेट घेतली. आपणच पुणे लोकसभा निवडणूक लढवण्यासाठी कशाप्रकारे योग्य आहोत आणि भाजपमध्ये अंतर्गत कुठलाही वाद नसून माझा कोणत्याही नेत्यासोबत संघर्ष नाही असं मुळीक यांनी बैठकीत बोलण्याची माहिती आहे. त्यामुळे भाजपचा हा अंतर्गत वाद आणि त्याचा फटका येत्या लोकसभा निवडणुकीत बसतो का हे पाहणं महत्त्वाचं आहे.
