पुणे : छत्रपती शिवाजी महाराज यांच्या राज्याभिषेक सोहळ्याच्या 350 व्या वर्धापनदिनानिमित्त कोथरूड व्यासपीठाने सोमवारी सायंकाळी ६.३० वाजता कोथरूड येथील पौड रस्त्यावरील पेठकर साम्राज्य समोर शिवशाहीर बाबासाहेब पुरंदरे यांच्या संकल्पनेतील राज्याभिषेक जिवंत सोहळा कार्यक्रमाचे आयोजन केले आहे. यावेळी उपमुख्यमंत्री देवेंद्र फडणवीस प्रमुख पाहूणे असतील. पालकमंत्री चंद्रकांत पाटील, राष्ट्रीय स्वयंसेवक संघाचे संघचालक रवींद्र वंजारवाडकर, माजी केंद्रीय मंत्री प्रकाश जावडेकर, शहराध्यक्ष जगदीश मुळीक आदी उपस्थित राहणार आहेत. हा कार्यक्रम सर्वांसाठी विनामूल्य आहे.
कोथरूड व्यासपीठाचे अध्यक्ष शाम देशपांडे यांनी महिती देताना सांगितले की, ‘महाराष्ट्रकीर्ती सौरभ प्रतिष्ठान च्या वतीने शिवशाहीर बाबासाहेब पुरंदरे यांच्या संकल्पनेतील कार्यक्रम होईल. यात तब्बल १५० कलाकारांचा सहभाग असणार आहे. राज्याभिषेक दिना निमित्त पद्म विभूषण श्री बाबासाहेब पुरंदरे लिखित आणि दिग्दर्शित छत्रपती शिवाजी महाराजांचा राज्याभिषेक सोहळा हा भव्य दिव्य कार्यक्रम कोथरूड भागामध्ये आयोजित करण्यात आला आहे. या कार्यक्रमाची तयारी आता अंतिम टप्प्यात आली असून उद्या सायंकाळी 6:30 वाजता कार्यक्रम सुरू होणार आहे.
