आरोग्य विभागाच्या वतीने ” स्वच्छ भारत अभियान, स्वच्छ सर्वेक्षण मिशन-२०२३” अन्वये ३१ मे जागतिक तंबाखू विरोधी निषेध दिनाचे औचित्त्य साधून कोथरूड भागातील प्रभाग क्रं. १२, डहाणूकर कॉलनी व कोथरूड गांवठाण आरोग्य कोठी अंतर्गत डहाणूकर कॉलनी, लक्ष्मीनगर झोपडपट्टी, डहाणूकर सर्कल, कमिन्स इंडिया लिमिटेड कंपनी गेट, कै. मदन दादा मुंडे भाजी मंडई, गोपीनाथनगर, बधाई चौक, मंत्रीपार्क, भेलके नगर चौक, म्हातोबा मंदिर परिसर, कोथरूड गांवठाण, शिवाजी चौक कर्वे पुतळा चौक, आशिष गार्डन चौक, परिसर, गाढवे कॉलनी, भेलकेवाडी, वृंदावन कॉलनी, गुजरात कालनी ईत्यादी परिसरातील प्रत्येक पान विक्री करणाऱ्या दुकानावर जाऊन पान तंबाखू, गुटखा खाणारे व विडी, सिगारेट ओढणाऱ्या सम्राटांना व परिसरातील नागरिकांना एकत्र करून जनजागृती अभियान राबवण्यात आले. सदर जागतिक तंबाखू विरोधी निषेध दिन साजरा करण्याचा मुख्य उद्देश काय? तसेच २०२३ सालच्या वर्षांची थिम काय? इतिहास काय? वरिष्ठ आरोग्य निरिक्षक राम सोनवणे जागतिक तंबाखू विरोधी निषेध दिनाची ऐतिहासिक पार्श्वभूमि समजावून सांगीतली. “संपूर्ण जगा मध्ये तंबाखू सेवनामुळे होणारे आजार आणि मृत्यूच्या वाढत्या आकडेवारी मुळे जागतिक आरोग्य संघटनेने १९८७ मध्ये जागतिक तंबाखू विरोधी दिन प्रथम सुरु केला.
तद्नंतर हा दिवस ७ एप्रिल १९८८ रोजी पहिल्यांदा साजरा कररण्यात आला. यानंतर जागतिक आरोग्य संघटनेने ३१ मे १९८८ साली ४२.२९ च्या ठरावान्वये पास झाल्या नंतर ३१ मे रोजी जागतिक तंबाखू विरोधी निषेध दिवस म्हणून साजरा केला जातो”. तसेच मोकादम वैजीनाथ गायकवाड यांनी तंबाखू सेवनामुळे मानवी समाजाच्या आरोग्याची हेळसांड कशा पद्धतीने होते तसेच या सेवनामुळे जागतिक आरोग्य संघटनेच्या सर्वेनुसार दरवर्षी ८ लाख लोक मृत्यूमुखी पडतात. शिवाय हृदय रोग, मधूमेह, पक्षाघात, तोंडाचा, आतड्याचा, जिभेचा कॅन्सर या रोगाचे प्रमाण वाढत आहे. तसेच विडी, सिगारेट ओढल्यामुळे हृदय, फुफ्फूसाचे आजार वाढत आहे .
या सेवनामुळे तरुण मुलाच्या मृत्यूचे प्रमाण वाढत आहे तरुण पिढी व्यसनापासून दूर राहावी. आरोग्य संपन्न, सुदृढ तरुण पिढी तयार होऊन भारतला महासत्ता घडवण्यासाठी निरोगी तरुण पिढी तयार व्हावी हा या जनजागृतीचा मुख्य उद्देश आहे”. असे वैजीनाथ गायकवाड यांनी सांगीतले. सदर जनजागृती मोहिमेत,” पान तंबाखू गुटरवा खाऊ नका आपले आरोग्य धोक्यात आणू नका, विडी सिगारेट ओढू नका, कर्क रोगाला आमंत्रण देऊ नका..! जीवनाला हो म्हणा, तंबाखूला नाही म्हणा..! नाही म्हणा तंबाखूला, सुखी राही संसार आपला…! नको कण तंबाखूचा, एक क्षण जीवनाचा…! पान, तंबाखू, गुटखा खाऊ नका, थुंकून आपले पुणे शहर घाण करू नका….!
अशा प्रकारच्या घोषणाही देण्यात आल्या. सदर जानजागृती अभियान महापालिका सहाय्यक आयुक्त माननीय के दरवाजे यांच्या मार्गदर्शनाखाली तसेच वरिष्ठ आरोग्य निरीक्षक राम सोनवणे यांच्या नेतृत्वाखाली शिवाय आरोग्य निरीक्षक करण कुंभार सचिन लोहकरे यांच्या निरीक्षणाखाली मोकादम वैजीनाथ गायकवाड, अण्णा ढावरे, अशोक खुडे, सेवक दत्ता जाधव, परेश कुचेकर, कुणाल जाधव जनवानीचे समीर अजकेकर, जयश्री पाटील व इतर नागरिक सहभागी झाले.
