पुणे : पुण्यातील वातावरणातील उष्णता पाहता पुढील काही दिवस कमालीचे तापमान राहणार आहे. हवामान खात्याने दिलेल्या अंदाजानुसार आज रविवारी पुण्यात उष्णतेचा पारा ४१ अंश सेल्सिअसच्यावर जाण्याची शक्यता वर्तवण्यात आली आहे. त्यामुळे कामाव्यतिरिक्त उन्हात बाहेर न पडण्याचे आवाहन हवामान खात्याकडून करण्यात आले आहे.
हवामान खात्याकडून सकाळी ११ ते दुपारी ३ पर्यंत बाहेर न पडण्याचे आवाहन करण्यात आले आहे. पुणे जिल्ह्यात आतापर्यंत ४२ अंश सेल्सिअस तापमानाची नोंद झाली आहे. पुण्यातील महत्वाच्या ठिकाणी ४० अंश सेल्सिअस तापमानाची नोंद झाली आहे. कोरेगाव पार्क, मगर पट्टा या भागात उच्च तापमानाची नोंद झाली आहे. पुणे जिल्ह्यातील तळेगाव ढमढेरे येथे देखील उच्च तापमानाची नोंद झाली आहे.
हवामान तज्ञांनी सांगितलेल्या माहितीनुसार, नैऋत्य मोसमी पावसाने शुक्रवारी निकोबार बेटाला स्पर्श केल्याने ही उष्णता वाढली आहे. पुणे आणि आसपासच्या भागात २६ मेपर्यंत ४० ते ४१ अंश सेल्सिअस तापमानात उष्णता जाणवेल, असंही हवामान खात्याने म्हटले आहे. सद्या किमान तापमान २४ ते २६ अंश सेल्सिअसच्या श्रेणीत असेल जे सामान्य श्रेणीपेक्षा १ ते २ अंश सेल्सिअसने अधिक असणार आहे.
पुण्यातील चिंचवड, लव्हाळे आणि मगरपट्टा यांसारख्या ठिकाणी ४१ ते ४२ अंश सेल्सिअस इतकी उष्णता जाणवणार आहे. तसेच पाषाण परिसरात ४० अंश सेल्सिअसवर किंचित थंड राहण्याची शक्यता हवामान खात्याकडून व्यक्त करण्यात आली आहे.
