अहमदाबाद | रविंद्र जडेजा याने निर्णायक क्षणी केलेल्या फटकेबाजीमुळे चेन्नई सुपर किंग्स चॅम्पियन ठरली. सीएसकेने आयपीएल 16 व्या मोसमातील अंतिम सामन्यात गुजरात टायटन्सवर 5 विकेट्सने विजय मिळवला. चेन्नईला डकवर्थ लुईस नियमानुसार विजयासाठी 15 ओव्हरमध्ये 171 धावांचं विजयी आव्हान मिळालं. चेन्नईने हे आव्हान शेवटच्या बॉलवर चौकार ठोकून पूर्ण केलं. रविंद्र जडेजा चेन्नईच्या विजयाचा शिल्पकार ठरला. जड्डूने चेन्नईला विजयााठी 2 बॉलमध्ये 10 धावांची गरज असताना सिक्स आणि फोर ठोकला. त्यामुळे चेन्नईने सनसनाटी विजय मिळवला. चेन्नईने महेंद्रसिंह धोनी याच्या नेतृत्वात पाचव्यांदा आयपीएल टॉर्फी जिंकण्याची कामगिरी केली. धोनीने या मोठ्या विजयानंतर पोस्ट मॅच प्रोडक्शनमध्ये हर्षा भोगले यांच्यासोबत संवाद साधला.
सामन्याचा धावता आढावा
गुजरातने 20 ओव्हरमध्ये 4 विकेट्स गमावून 214 धावा केल्या होत्या. त्यामुळे चेन्नईला विजयासाठी आधी 215 धावांचं आव्हान मिळालं होतं. मात्र चेन्नईच्या बॅटिंगला सुरुवात झाल्याच्या 3 बॉलनंतर पावसाची एन्ट्री झाली. पावसामुळे काही तास वाया गेले. त्यामुळे चेन्नईला डकवर्थ लुईस नियमानुसार 15 ओव्हर्समध्ये विजयासाठी 171 धावांच सुधारित आव्हान मिळालं. हे आव्हान चेन्नईने 5 विकेट्सच्या मोबदल्यात पूर्ण केलं.
चेन्नई पाचव्यांदा चॅम्पियन
दरम्यान चेन्नई सुपर किंग्सची आयपीएल ट्रॉफी जिंकण्याची ही पाचवी वेळ ठरलीय. चेन्नईने पहिल्यांदा 2010 साली मुंबई इंडियन्सला पराभूत करत आयपीएल ट्रॉफी जिंकली होती. तेव्हापासून चेन्नईने 2010, 2011, 2018, 2021 आणि 2023 अशा एकूण 5 वेळा हा कारनामा केलाय. चेन्नईने यासह मुंबई इंडियन्सच्या विक्रमाची बरोबरी केली आहे. मुंबईनेही 5 वेळा ट्रॉफी जिंकली आहे.
धोनीची निवृत्तीबाबत प्रतिक्रिया
“माझी निवृत्ती जाहीर करण्याची ही सर्वोत्तम वेळ आहे. मला जेवढे प्रेम मिळाले आहे, इथून निघून जाणं ही सोपी गोष्ट आहे, पण त्याहून कठीण गोष्ट म्हणजे 9 महिने मेहनत करून पुन्हा आयपीएल खेळण्याचा प्रयत्न करणं. हे माझ्याकडून एक भेट असेल, शरीरासाठी ते सोपं होणार नाही” अशी धोनीने प्रतिक्रिया दिली.
