जम्मू : जम्मू आणि काश्मीरमधील राजौरी जिल्ह्यात सुरक्षादल आणि दहशतवाद्यांमध्ये झालेल्या चकमकीत ५ जवान शहीद झाले. याबाबत मिळालेल्या माहितीनुसार, आयईडी स्फोटात एका अधिकाऱ्यासह काही जवान जखमी झाले आहेत. जखमींना तातडीने हेलिकॉप्टरद्वारे उपचारासाठी नेण्यात आले आहे. परिसरात २ ते ३ दहशतवादी लपून बसल्याची माहिती सुरक्षादलाला मिळाली होती. यानंतर सुरक्षादलाच्या जवानांनी या परिसराला सर्व बाजूंनी घेरले. राजौरी जिल्ह्यातील बनयारी पर्वतीय क्षेत्रातील डोक परिसरात ही चकमक सकाळपासून सुरू आहे.
चकमक आणि चकमकीदरम्यान झालेल्या स्फोटात अनेक दहशतवादी ठार झाल्याचेही वृत्त आहे. पाकिस्तानचे परराष्ट्र मंत्री बिलावल भुट्टो हे भारत दौऱ्यावर आहेत. अशात राजौरी येथील ही घटना मोठी घटना आहे. या घटनेनंतर राजौरीमध्ये इंटरनेटवर बंदी घालण्यात आली आहे. यासोबतच लष्कराचे अधिकारी घटनास्थळी तळ ठोकून आहेत.
दहशतवाद खपवून घेतला जाणार नाही: परराष्ट्रमंत्री जयशंकर
पाकिस्तानचे परराष्ट्र मंत्री बिलावत भुट्टो यांच्या भारत भेटीदरम्यान भारताच्या परराष्ट्रमंत्र्यांनी दहशतवादाबाबत स्पष्ट संदेश दिला आहे. जयशंकर म्हणाले की, भारत कोणत्याही किंमतीवर दहशतवाद सहन करणार नाही. अशा परिस्थितीत राजौरीमध्ये जवानांच्या शहीद होण्याची ही घटना मोठी आहे.
दहशतवाद्यांबाबत माहिती मिळताच शोध मोहीम हाती
या चकमकीच्या घटनेबाबत लष्कराच्या सूत्रांनी दिलेल्या माहितीनुसार, या भागात दहशतवादी लपल्याची बातमी मिळाली होती. या महत्त्वाच्या गुप्त माहितीवरून लष्कर आणि जम्मू-काश्मीर पोलिसांच्या पथकाने संयुक्त शोध मोहीम सुरू केली. यादरम्यान दहशतवाद्यांचा सुगावा लागताच त्यांनी समोरून गोळीबार सुरू केला. याला प्रत्युत्तर म्हणून सुरक्षा दलांनीही गोळीबार केला.
