राष्ट्रवादीच्या नेत्या आणि महाराष्ट्र राज्य महिला आयोगाच्या माजी अध्यक्षा रुपाली चाकणकर यांच्या प्रतिमेला धक्का पोहोचवल्याच्या आरोपावरून पुणे पोलिसांनी तब्बल १९ जणांविरोधात एफआयआर नोंदवला आहे. शिवाजीनगर पोलीस ठाण्यात त्यांनी दिलेल्या तक्रारीच्या आधारे पोलिसांनी ही पावले उचलली असून प्रकरणाचा सखोल तपास सुरू आहे.
या कारवाईमध्ये अनेक राजकीय कार्यकर्ते आणि प्रसिद्ध चेहऱ्यांचा समावेश आहे. यामध्ये विशेषतः शिवसेनेच्या (ubt) सुषमा अंधारे, राष्ट्रवादी काँग्रेसच्या रुपाली ठोंबरे, अभिनेत्री दिपाली सय्यद, सामाजिक कार्यकर्त्या संगीता तिवारी, डॉ. आशा मिरगे, हनुमंत गलगटे आणि वर्षा कांबळे यांच्यावर गुन्हा नोंदविला आहे. तर राष्ट्रवादी (शरद पवार गट) सोशल मीडिया सेलचे योगेश सावंत, मोहसीन शेख तसेच महादेव बालगुडे यांचे देखील नाव FIR मध्ये आहेत.
फिर्यादीत नमूद केलेल्या माहितीनुसार, नाशिकस्थित ईशान्येश्वर महादेव मंदिर ट्रस्टचा प्रमुख भोंदू अशोक खरात याच्याशी रुपाली चाकणकर यांची ओळख एका सार्वजनिक कार्यक्रमादरम्यान झाली होती. त्या धार्मिक सोहळ्याच्या निमित्ताने तेथे उपस्थित राहिल्या होत्या. दरम्यान, खरात याला अटक झाल्याचे वृत्त समोर आल्यानंतर, त्याच्यासोबतचे जुने छायाचित्र आणि व्हिडिओ इंटरनेटवर जाणीवपूर्वक प्रसारित करून खोटे व बिनबुडाचे आरोप केले जाऊ लागले. विविध डिजिटल व्यासपीठांवरून (फेसबुक, इंस्टाग्राम, युट्यूब) बदनामीकारक मजकूर, शिवीगाळ आणि धमक्या दिल्याचा दावा चाकणकर यांनी केला आहे. तसेच कमेंट्सच्या माध्यमातून अश्लील भाषा वापरून लैंगिक छळवणूक व मानहानी केल्याचे त्यांनी म्हटले आहे.
दरम्यान, या संदर्भातील सर्व डिजिटल पुरावे व स्क्रीनशॉट्स पोलिसांकडे सोपवण्यात आले असून, पोलिसांनी भारतीय न्यायसंहितेच्या संबंधित कलमांनुसार गुन्हा नोंदवून पुढील चौकशी हाती घेतली आहे.
