मुंबई दि. ११ (रामदास धो. गमरे) बौद्धजन पंचायत समिती संलग्न संस्कार समिती यांच्या संयुक्त विद्यमाने स्त्री शिक्षणाच्या प्रणेत्या, आद्यशिक्षिका सावित्रीबाई फुले यांचा १२९ वा स्मृतिदिन उपकार्याध्याक्ष मनोहर सखाराम मोरे यांच्या अध्यक्षतेखाली डॉ. बाबासाहेब आंबेडकर स्मारक सभागृह, भोईवाडा, परेल, मुंबई – १२ येथे संपन्न झाला. सदर प्रसंगी मनोहर सखाराम मोरे यांनी महामानवाच्या प्रतिमांना पुष्पहार अर्पण केला तर विवाह मंडळाचे अध्यक्ष राजाभाऊ तथा रामदास धो. गमरे यांनी आदरणीय माता सावित्रीबाई फुले यांच्या प्रतिमेला पुष्पहार अर्पण केला तर आदर्श बौद्धाचार्या यांनी ज्योत प्रज्वलित करून कार्यक्रमाला सुरुवात केली. संस्कार समितीचे अध्यक्ष मंगेश पवार गुरुजी व सरचिटणीस मनोहर बा. मोरे यांनी आपल्या सुमधुर व गोडवाणीने धार्मिक पूजाविधी संपन्न केली.
संस्कार समितीचे अध्यक्ष मंगेश पवार यांनी प्रास्ताविक सादर करीत असताना “सावित्रीबाई फुले या भारतातील पहिल्या महिला शिक्षिका असून त्यांनी १८४८ ला पुण्यात भिडे वाडा येथे आपले पती महात्मा ज्योतिबा फुले यांच्या सहकार्याने मुलींची पहिली शाळा सुरू केली, त्यांनी स्त्री शिक्षण, विधवा पुनर्विवाह, अस्पृश्यता यावर मोठे योगदान देऊन फार मोठे काम केले आहे, तळागळातील वंचित, मागास समाजासाठी, अस्पृश्य घटकांसाठी शाळा सुरू केल्या, सोबतच काव्यफुले, बावनकशी, सुबोध रत्नाकर अशी अनेक पुस्तके त्यांनी लिहून सामाजिक प्रबोधन करण्याचा प्रयत्न केला, सन १८९७ साली प्लेगच्या साथीत रुग्णांची निस्वार्थ सेवा करीत असताना त्यांनाही प्लेगची लागण झाली व त्यातच त्यांचा मृत्यू झाला, सावित्रीबाई फुले या भारतातील एक आदर्श शिक्षिका होत्या त्यांनी सुरू केलेल्या स्त्री शिक्षणामुळेच आजची स्त्री पुरुषांच्या खांद्याला खांदा लावून पुढे जात आहे” असे नमूद केले.
बौद्धजन पंचायत समितीचे कार्यसम्राट कार्याध्यक्ष लक्ष्मण भगत, सरचिटणीस राजेश घाडगे, अर्थसमितीचे विलास जाधव, उपकार्याध्यकश मनोहर सखाराम मोरे, अशोक जाधव आदींनी आपले विचार मांडून होत उपस्थितांना मार्गदर्शन केले, तद्नंतर सावित्रीबाई फुले यांच्या पवित्र स्मृतीस सामुदायिक श्रद्धांजली अर्पण करून त्यांना मानवंदना देण्यात आली सरतेशेवटी सदर कार्यक्रम यशस्वीपणे पार पाडण्यासाठी अथक परिश्रम घेणाऱ्या सर्वांचे आभार मानून संस्कार समितीचे सरचिटणीस मनोहर बा. मोरे कार्यक्रमाची सांगता केली.
